राज्यपालांसह मुख्यमंत्री, पालकमंत्र्यांची उपस्थिती
म. टा. प्रतिनिधी, नाशिक
महाराष्ट्र आरोग्य विज्ञान विद्यापीठाचा चौथ्या विशेष पदवी प्रदान समारंभ मंगळवारी (दि. ३०) मुंबईतील सह्याद्री अतिथीगृहात दुपारी ३.३० वाजता होणार आहे. यासाठी कुलपती तथा राज्यपाल सी. विद्यासागर राव हे अध्यक्ष म्हणून उपस्थित राहणार आहेत. या सोहळ्यात राज्यपाल यांच्या हस्ते सामाजिक कार्यकर्ते डॉ. अभय बंग आणि डॉ. राणी बंग यांना विद्यापीठाची डी. लिट ही मानद पदवी प्रदान करण्यात येणार आहे.
सोहळ्यास प्रमुख पाहुणे म्हणून मुख्यमंत्री देवेंद्र फडणवीस, विद्यापीठाचे प्रति-कुलपती तथा वैद्यकीय शिक्षणमंत्री गिरीश महाजन, वैद्यकीय शिक्षण विभागाचे राज्यमंत्री रवींद्र चव्हाण, कुलगुरू डॉ. दिलीप म्हैसेकर, प्रति-कुलगुरू डॉ. मोहन खामगांवकर, कुलसचिव डॉ. कालिदास चव्हाण आदी मान्यवरांची उपस्थिती असेल. विद्यापीठाकडून आरोग्य व सामाजिक क्षेत्रत उल्लेखनीय कार्य करणाऱ्या व्यक्तींना विद्यापीठातर्फे डी. लिट या मानद पदवीने सन्मानित केले जाते. डॉ. बंग दाम्पत्याने दुर्गम आदीवासी भागांमध्ये तीन दशकांपासून अधिक कालावधी आरोग्य आणि सामाजिक सेवा केली आहे. डॉ. अभय बंग हे 'सर्च' या संस्थेमार्फत दुर्गम व आदिवासी ग्रामीण भागात वैद्यकीय सेवा देण्याचे कार्य करतात. परदेशात वैद्यकीय शिक्षण घेऊन त्याचा उपयोग त्यांनी देशातील लहान बालके, आदिवासी महिलांच्या आरोग्य सेवेसाठी केला आहे. समाजातील व्यसनांचे वाढते प्रमाण कमी करण्यासाठी जनजागृती तसेच व्यसनमुक्ती उपक्रमांवर त्यांनी भर दिला आहे. आदिवासी भागात बालमृत्यूचे प्रमाण अधिक असून असे प्रश्न सोडविण्यासाठी मोठ्या प्रमाणात प्रयत्न केला. बालमृत्यू कमी करण्यासाठी त्यांनी संशोधित केलेले 'नवजात बालसेवा' हे मॉडेल जगभरातील अन्य देशात आजही प्रभावीपणे वापरले जात आहे. त्यांच्या सर्च संस्थेचे कार्य व कार्यपद्धती जॉन्स हॉपकिन्स विद्यापीठाच्या अभ्यासक्रमात समाविष्ट आहे. विद्यार्थ्यांना 'केस स्टडी' म्हणून शिकविले जाते. वैद्यकीय नियतकालिक 'द लॅन्सेट' मध्ये त्यांचे अनेक लेख छापून आलेले आहेत. त्यांचे स्वत:च्या हृदयरोगावरील अनुभवकथनाचे 'माझा साक्षात्कारी हृदयरोग' पुस्तकातून केले आहे. याच कार्याची दखल घेत डॉ. अभय व डॉ. राणी बंग यांना विद्यापीठातर्फे राज्यपाल यांच्या हस्ते सन्मान्य पदवी प्रदान करून गौरविण्यात येणार आहे.