कॅनॉलवरच सुलभ शौचालये

गंगापूररोडवरील उजव्या कॅनॉलची दुरवस्था

म. टा. वृत्तसेवा, गंगापूररोड

नाशिक शहरात शेतजमिनी असताना जलसिंचन विभागाने शेतकऱ्यांना शेतीसाठी पाणी मिळावे याकरीता हजारो एकर शेतजमिनी आरक्षित केल्या. यामधील गंगापूर धरणातून उजव्या कॅनॉलची उभारणी करण्यात आली होती. परंतु, शहराच्या मध्यवर्ती भागातून जाणाऱ्या या कॅनॉलवर चक्क महापालिकेने सुलभ शौचालये उभारल्याचे चित्र आहे.

काही राजकारण्यांच्या हट्टापोटी कॅनॉलची दुरवस्था होत आहे, असे सुज्ञ नाशिककरांचे मत आहे. त्यात या कॅनॉलबाबत महापालिका व जलसिंचन विभाग कधी लक्ष देणार, असा सवाल नागरिकांनी केला आहे.


सांडपाणी थेट पाइपलाइनीत

शेतकऱ्यांना शेतीसाठी लागणाऱ्या पाण्याची व्यवस्था व्हावी या हेतूने शहरात गंगापूर धरणातून उजव्या कॅनॉलची उभारणी करण्यात आली होती. कालांतराने शहराची वाढत्या लोकसंख्येत कॅनॉलच्या बाजूला असलेली शेतीच गायब झाली. यानंतर कॅनॉल बंद करण्यात आल्याने नाशिक महापालिकेला पाणीपुरवठा करणारी थेट पाइपलाइन टाकण्यात आली. परिणामी, दिवसेंदिवस महापालिका व जलसिंचन विभागाने गंगापूर धरणातून निघणाऱ्या उजव्या कॅनॉलकडे दुर्लक्ष केल्याने आजमितीस दिसेनासा झाला असून, केवळ ब्रिटिशकालीन कॅनॉलचे अस्तित्व पहायला मिळत आहे. यामध्ये काही राजकीय पुढाऱ्यांच्या हट्टापायी कॅनॉलरोडलाच शौचालयांची उभारणी करण्यात आल्याने थेट पाइपलाइनीत सांडपाणी जात असल्याने त्याचा त्रास रहिवाशांना सहन करण्याची वेळ येत आहे.