म. टा. प्रतिनिधी, नाशिक
बर्फ वितळले तर पाणी होते, पाणी प्रवाही झाले तर नदीच्या रुपाने वाहते, आपल्या आजूबाजूचे जीवन समृद्ध करते, तसेच वाचनाने आपले जीवन समृद्ध होते. भारताचे माजी राष्ट्रपती डॉ ए. पी.जे.अब्दुल कलाम यांचे जीवन निर्मळ गंगेसारखे प्रवाही राहिले, वाचनाने मनुष्य समृद्ध होतो याचे जिवंत उदाहरण म्हणजे डॉ. कलाम, असे प्रतिपादन प्राचार्या डॉ. वेदश्री थिगळे यांनी केले.
त्र्यंबक येथील ‘मविप्र’च्या कला, वाणिज्य आणि विज्ञान महाविद्यालयात वाचन प्रेरणा दिन कार्यक्रमाच्या अध्यक्षा म्हणून प्राचार्या डॉ. थिगळे बोलत होत्या.
त्या म्हणाल्या, की भारतालाच नव्हे तर जगातल्या अनेक देशांना त्यांच्या ज्ञानाने व संशोधनाने नवी व विधायक दिशा दिली. वैज्ञानिक क्षेत्रात नेत्रदीपक कामगिरी करणारे कलामसाहेब लहान मुलांमधेही तितक्याच निरागसपणे रमत असत, यावरून त्यांची थोरवी लक्षात येते. अत्यंत गरिबीत जन्माला येऊनही प्रचंड परिश्रम घेऊन ते देशाच्या सर्वोंच्च पदावर पोहचले, भारताला जगात सर्वोच्च स्थानी पोहचविण्याचे स्वप्न त्यांनी पाहिले. ते पूर्ण करण्याचे काम आपल्याला करायचे आहे असे प्रत्येक भारतीयाने समजून घेतले पाहिजे, त्या दिशेने प्रयत्न व्हावेत.
याप्रसंगी प्रमुख वक्ते म्हणून प्रा. शरद धट, सत्र प्रमुख प्रा. सुरेश देवरे, संयोजक प्रा. माधव खालकर, डॉ. संदीप माळी, डॉ. छाया शिंदे, प्रा. नीता पुणतांबेकर, प्रवीण गोले, डॉ. शरद कांबळे, डॉ. अतुल गावंडे आदी मान्यवर उपस्थित होते.
प्रा. शरद धट यांनी डॉ. कलाम यांचे कार्य व कर्तृत्व आपल्या अभ्यासपूर्ण भाषणातून स्पष्ट केले. अनेक भावप्रसंगाच्या आधारे वाचनाचे महत्त्व विषद केले. डॉ. संदीप माळी यांनीही मनोगत व्यक्त केले. भगवान गोऱ्हे, बाळकृष्ण कानकाटे, पूनम महाले, पूजा पगार या विद्यार्थ्यांनीही डॉ. कलामांचे कार्य व शिकवण या विषयावर विचार मांडले.
वाचन प्रेरणा दिन निमित्त ग्रंथपाल आनंदा जाधव यांनी भरविलेल्या ग्रंथप्रदर्शनाचे प्राचार्या डॉ. थिगळे यांच्या हस्ते उद्घाटन झाले. ग्रंथ, विश्वकोश कसे पहावेत याची माहिती यावेळी प्राचार्या डॉ. थिगळे यांनी दिली. भाषण केलेल्या विद्यार्थ्यांचा पुस्तके भेट देऊन सत्कार केला. प्रा माधव खालकर यांनी प्रास्ताविक केले. डॉ. छाया शिंदे यांनी सूत्रसंचालन केले. प्रा. प्रवीण गोले यांनी आभार मानले.