त्र्यंबक विश्वस्तपदी
डॉ. सत्यप्रिय शुक्ल
म. टा. वृत्तसेवा, त्र्यंबकेश्वर
श्री त्र्यंबकेश्वर देवस्थानाच्या विश्वस्तपदी डॉ. सत्यप्रिय ज्ञानेश्वर शुक्ल यांची सहायक धर्मादाय आयुक्त यांनी निवड केली आहे. डॉ. शुक्ल यांची दुसऱ्यांदा निवड झाली आहे.
यापूर्वी ४ जुलै २०१८ रोजी देवस्थान विश्वस्त सदस्यांची निवड झाली होती. त्यावेळेस पूजक प्रतिनिधी म्हणून डॉ. शुक्ल आणि मिलिंद दशपुत्र असे दोन अर्ज आले होते. त्र्यंबकेश्वर देवस्थानात स्थानिक भाविकांमधून चार सदस्य, तुंगार मंडळी प्रतिनिधी एक सदस्य, पुरोहित संघ प्रतिनिधी एक सदस्य आणि त्रिकाल पूजक प्रतिनिधी एक असे सात सदस्य घ्यावे लागतात. नगरपालिका मुख्याधिकारी सचिव आणि जिल्हा सत्र न्यायाधीश अध्यक्ष असे एकूण नऊ सदस्य असलेला आराखडा सर्वोच्च न्यायालयाने दिलेला आहे.
विश्वस्त सदस्यांची २०१३ मध्ये मुदत संपल्यानंतर चार जुलै २०१८ रोजी नव्याने निवड झाली होती. यात स्थानिक भाविक प्रतिनिधी सदस्य अॅड. संतोष दिघे, अॅड. पंकज भुतडा, संतोष कदम, तृप्ती धारणे यांची मुलाखतीद्वारे निवड झाली होती. पुजारी तुंगार मंडळी यांनी दिलीप तुंगार यांची आणि पुरोहित संघ प्रतिनिधी म्हणून अध्यक्ष प्रशांत गायधनी यांची नियुक्ती झाली. मंदिराचे त्रिकाल पूजक दशपुत्रे, शुक्ल आणि तेलंग आहेत.