काडेपेट्या घेऊन जाणाऱ्या ट्रकला आग

मनमाड

काडेपेट्या घेऊन जाणाऱ्या एका ट्रकला या काडेपेट्यांमुळेच आग लागल्याचा प्रकार मनमाडमध्ये घडला आहे. या अपघातात हा संपूर्ण ट्रक जळून खाक झाला. मनमाड-मालेगाव मार्गावर पहाटे ६ वाजताच्या सुमारास हा अपघात झाला.

आगीचे वृत्त कळताच मालेगाव तालुका पोलीस आणि अग्निशमन दलाचे बंब तातडीने घटनास्थळी आले. या अपघातामुळे मनमाड-मालेगाव मार्गावर सकाळी काही वेळ वाहतूक कोंडी झाली होती. कारण आग विझवेपर्यंत वाहतूक थांबवण्यात आली होती.

संपूर्ण आग सुमारे ३ तासानंतर विझवण्यात अग्निशमन दलाला यश आलं. तोपर्यंत वाहतूक हळूहळू सुरू करण्यात आली होती.