म. टा. वृत्तसेवा, घोटी
इगतपुरी शहरातील कोकणी मोहल्ला येथे पूर्ववैमनस्यातून दोघांवर रॉकेल टाकून जिवंत जाळण्याचा प्रयत्न केल्याची धक्कादायक घटना गणपती विसर्जन मिरवणुकीदरम्यान रविवारी रात्री साडेनऊ वाजता घडली. यात तिघे गंभीर भाजले असून, जखमींना इगतपुरी रुग्णालयात प्राथमिक उपचार करून पुढील उपचारासाठी जिल्हा रुग्णालयात दाखल केले आहे.
शहरातील कोकणी मोहल्ला येथे रविवारी सायंकाळी साडेपाच वाजता गणपती विसर्जन करून आल्यानंतर संशयित आरोपी कुणाल किशोर हरकरे (वय २८) याने प्रशांत उर्फ लखन बंडू बोरसे, दीपक बंडू बोरसे यांना तू माझ्याकडे रागाने का बघतो म्हणून शिवीगाळ केली. शाब्दिक बाचाबाची झाल्यानंतर काही वेळेपुरता हा वाद स्थानिकांच्या मदतीने मिटविण्यात आला होता. दरम्यान, रात्री साडेनऊ वाजेच्या सुमारास आरोपी कुणाल किशोर हरकरे याने घरातून रॉकेलचे भरलेले भांडे प्रशांत बोरसे (वय २७) व त्याचा भाऊ दीपक बोरसे (वय २४) यांच्या अंगावर अचानक फेकले. तसेच रॉकेलमध्ये भिजवलेल्या बोळ्याने आग लावली. यात दोघेही गंभीर भाजले. या दोघांना वाचविण्यासाठी सुरेश गुप्ता गेला असता, तो ही गंभीर भाजला. जखमींवर प्राथमिक उपचार करून नाशिक जिल्हा रुग्णालयात हलविण्यात आले.
या प्रकरणी इगतपुरी पोलिस ठाण्यात जखमी दीपक बंडू बोरसे यांने पोलिसांना फिर्याद दिली आहे. पोलिसांनी या घटनेचे गांभीर्य पाहता भादवि कलम ३०७ प्रमाणे गुन्हा दाखल केला आहे.