सिन्नर : शहरातील भगवतीमाता मंदिरात बुधवारी (दि. २४) मध्यरात्री दीड वाजेच्या सुमारास दोघा अज्ञात चोरट्यांनी मंदिराची दानपेटी फोडण्याचा प्रयत्न केला. मात्र, हाती काही न लागल्याने चोरट्यांनी काढता पाय घेतला. हा सर्व प्रकार सीसीटीव्ही कॅमेऱ्यामध्ये कैद झाल्याचे दिसून आले.
आडव्या फाट्याजवळ हेमाडपंथी ऐश्वर्य मंदिरजवळ भगवतीमाता मंदिर आहे. चोरट्यांनी पाठीमागील बाजूस असलेल्या नदीच्या मार्गाने मंदिरात प्रवेश केला. लोखंडी पहारीच्या सहाय्याने दानपेटी फोडण्याचा प्रयत्न केला. मात्र, दानपेटी खोल व लोखंडी जाळी असल्याने चोरट्यांचा हात ऐवजापर्यंत पोहोचला नाही.
मंदिराच्या पुजारी शोभा तनपुरे व वसंत तनपुरे या मंदिराच्या परिसरात राहतात. शोभा तनपुरे यांनी सकाळी उठल्यावर दरवाजा उघडण्याचा प्रयत्न केला. मात्र, घराला बाहेरील कडी लावली असल्याने त्यांनी भाविकांना आवाज दिला. काही भाविकांनी दरवाजाची कडी उघडली. तनपुरे मंदिरात आल्या असता दानपेटी फोडण्याचा प्रयत्न झाल्याचे त्यांच्या निदर्शनात आले. ही बाब त्यांनी स्थानिक नागरिकांना तात्काळ सांगितली. यानंतर सिन्नर पोलिसांनी घटनास्थळी भेट देऊन पाहणी केली.