म. टा. खास प्रतिनिधी, नाशिक
स्टेट बँक ऑफ इंडियाच्या ३२ क्रेडिट कार्डधारकांची गोपनीय माहिती मिळवून सायबर चोरट्यांनी बारा लाखांना गंडविले आहे. या प्रकरणी पोलिसदप्तरी फसवणूक आणि माहिती तंत्रज्ञान अधिनियमअंतर्गत गुन्हा दाखल करण्यात आला आहे.
नफिस अख्तर शेख (वय ४२, रा. सातपूर-अंबड लिंकरोड) यांनी या प्रकरणी तक्रार दिली आहे. शेख स्टेट बँक ऑफ इंडियाचे क्रेडिट कार्डधारक असून, त्यांच्या कार्डच्या माध्यमातून परस्पर व्यवहार करण्यात आल्याने हा प्रकार समोर आला. गेल्या सप्टेंबर महिन्यापासून हॅकरने शहरातील सुमारे ३२ कार्डधारकांच्या अकाउंटची गोपनीय माहिती मिळवित हा उद्योग केला आहे. 'एसबीआय'च्या क्रेडिट कार्ड कार्यालयातून बोलत असल्याचे भासवून ग्राहकांशी संपर्क साधला जात आहे. यावेळी कार्डची माहिती आणि ओटीपी नंबर मिळवून भामट्यांकडून कार्डवर परस्पर व्यवहार केले जात आहेत. आजपर्यंत शहरातील ३२ ग्राहकांनी पोलिसांशी संपर्क साधला असून, त्यात तब्बल ११ लाख ८६ हजार ६३ रुपयांची आर्थिक फसवणूक झाल्याचे म्हटले आहे. निरीक्षक श्रीपाद परोपरकारी तपास करीत आहेत.