म. टा. वृत्तसेवा, कळवण
देवळा-कळवण मार्गावर मटाणे गावाजवळ दोन दुचाकींची शुक्रवारी (दि. २६) सायंकाळी समोरासमोर धडक होऊन एक जण ठार तर तीन जण जखमी झाले आहेत. जखमींमधील दोन जणांची प्रकृती गंभीर असून त्यांना मालेगाव येथील सामान्य रुग्णालयात दाखल करण्यात आले आहे.
सरस्वती वाडी (ता. देवळा) येथील बाळू खंडू वाघ हे वडील खंडू वाघ यांच्यासोबत बजाज डिस्कव्हर या दुचाकीवरून (एमएच ४१ एएफ १७३२) कळवणकडून देवळा शहराकडे जात होते. राजेंद्र रामदास माळी (वय ३०, रा. शिरसमणी, ता. कळवण) आणि बाळू गणपत गांगुर्डे (वय ४०, रा. कळमथे, ता. कळवण) हे स्प्लेंडर प्रो दुचाकीवरून (एमएच १५ डीव्ही १७६१) देवळ्याकडून कळवणच्या दिशेने येत होते. दोन्ही दुचाकींची मटाणे गावाजवळ समोरासमोर धडक होऊन भीषण अपघात घडला. यात बाळू वाघ (वय ५५) हे जागीच ठार झाले तर सोबत असलेले त्यांचे वडील खंडू वाघ (वय ८५) हे किरकोळ जखमी झाले. समोरील दुचाकीवरील राजेंद्र माळी व बाळू गांगुर्डे हे डोक्याला मार लागून गंभीर जखमी झाले. त्यांना मालेगाव येथे उपचारासाठी पाठविण्यात आले आहे.
प्रत्यक्षदर्शींच्या माहितीनुसार, दोन्ही दुचाकींवरील चालकांनी हेल्मेट परिधान केलेले नव्हते. त्यामुळे डांबरी रस्त्यावर पडून मेंदूला गंभीर दुखापत झाल्याने बाळू वाघ यांच्यावर मृत्यू ओढवला तर दोघे गंभीर आहेत. सहाय्यक पोलिस निरीक्षक खंडेराव रंजवे यांच्या मार्गदर्शनाखाली सहाय्यक उपनिरीक्षक आर. एम. राठोड व अशोक फसाले अधिक तपास करीत आहेत.