म. टा. प्रतिनिधी, नाशिक
नागरिकत्व दुरुस्ती कायदा (सीएए) आणि राष्ट्रीय नागरिकता नोंदणीच्या (एनआरसी)विरोधात दिल्ली येथे सुरू असलेल्या शाहीनबागप्रमाणे शहरात आज, शनिवार (दि. २२)पासून 'साहिदबाग' आंदोलनांअंतर्गत रात्रंदिवस ठिय्या देण्यात येणार आहे. सुमारे पाच हजार मुस्लिम महिला या आंदोलनात सहभागी होणार असून, आंदोलन किती काळ सुरू राहील याबाबत निश्चित सांगण्यात आलेले नाही.
त्र्यंबकरोडवरील ईदगाह मैदानावर शनिवारी सकाळी ११ वाजेपासून सादिकबाग आंदोलन सुरू होणार असून, त्यासाठी 'चलो सादिकबाग' अशी हाक देण्यात आली आहे. संविधान बचाओ एकता समितीतर्फे हे आंदोलन पुकारण्यात आले असून, जुने नाशिकसह वडाळा गाव, सिडको, सातपूर, नाशिकरोड भागातील हजारो महिला त्यात सहभागी होणार आहेत. यावेळी सीएए, एनसीआर, एनपीआरचा निषेध नोंदविण्यात येणार आहे, तसेच नागरिकत्त्व दुरुस्ती कायदा ताबडतोब रद्द करा, एनपीआरची नोंदणी रद्द करा, जामिया आणि जेएनयू येथे विद्यार्थ्यांवर पोलिसांनी केलेल्या लाठीमाराची चौकशी करा, या मागण्या केल्या जाणार असल्याचे आयोजकांनी सांगितले. दरम्यान, जोपर्यंत सीएए, एनसीआर हे काळे कायदे रद्द होत नाहीत, तोपर्यंत आंदोलन सुरू राहणार असल्याची शक्यता आहे. गेल्या आठवड्यात 'एक शाम शाहीनबाग के नाम' ही सभा बडी दर्गा येथे घेण्यात आली. तेव्हापासून सादिकबागच्या आंदोलनाची तयारी सुरू होती. यानिमित्त शहरातील विविध मशिदींमध्ये नमाजवेळी साहिदबागच्या आंदोलनाला पाठिंबा देण्यासह सहभागी होण्याचे आवाहन करण्यात आले आहे. या आंदोलनाला अनेक सामाजिक संघटनांनी पाठिंबा दिला आहे.
या आंदोलनाच्या पूर्वसंध्येला पोलिसांनी ईदगाह मैदान येथे पाहणी करून आयोजकांशी चर्चा केली. आंदोलनासाठी पोलिसांचा मोठा बंदोबस्त तैनात करण्यात आला असून, आंदोलनात केवळ महिला सहभागी होणार आहेत. हजारोंच्या संख्येने आंदोलक जमणार असल्याने विशेष दक्षता घेण्यात आल्याची माहिती पोलिसांनी दिली.