एकनाथ शिंदे यांची प्रस्तावित बैठक रद्द

म. टा. खास प्रतिनिधी, नाशिक

महापालिका निवडणुकांच्या पार्श्वभूमीवर शिवसेनेच्या वातावरण निर्मितीसाठी नगरविकासमंत्री एकनाथ शिंदे यांची आज, शनिवारी (दि. २०) महापालिकेत होणारी प्रस्तावित बैठक अखेर रद्द झाली आहे. करोनाच्या पार्श्वभूमीवर जमावबंदी लागू झाल्याने आणि चोवीस तासांत राज्य मंत्रिमंडळातील चार मंत्री करोनाबाधित झाल्यामुळे शिंदे यांनी बैठक रद्द केल्याची माहिती शिवसेनेच्या पदाधिकाऱ्यांकडून देण्यात आली. दरम्यान, करोनामुळे शिंदे यांनी बैठक रद्द केल्याने सार्वजनिक बांधकाममंत्री अशोक चव्हाण यांच्या रविवारच्या आणि विरोधी पक्षनेता देवेंद्र फडणवीस यांच्या सोमवारच्या प्रस्तावित दौऱ्याकडे सर्वांचे लक्ष लागून आहे.

नाशिक महापालिकेवर भगवा फडकवण्याची घोषणा शिवसेनेकडून केल्यानंतर आता वातावरण निर्मितीसाठी नगरविकासमंत्री शिंदे आज नाशिक महापालिकेच्या कामकाजाचा आढावा घेणार होते. बैठकीसाठी विरोधी पक्षनेते अजय बोरस्ते यांनी शहर आणि महापालिकेच्या दृष्टीने जमवलेल्या महत्त्वाच्या विषयांचे मंत्र्यांपुढे सादरीकरण करणार होते. मात्र, जमावबंदीचे आदेश जारी झाल्याने बैठकी व कार्यक्रमांवर बंधने घालण्यात आली आहेत. दुसरीकडे राज्य मंत्रिमंडळातील तब्बल चार मंत्री चोवीस तासांत करोना पॉझिटिव्ह झाले आहेत. त्यामुळे करोनाच्या वाढत्या प्रादुर्भावामुळे आणि कलम १४४ लागू झाल्यामुळे दौऱ्यात गर्दी होण्याची शक्यता गृहीत धरून शिंदे यांचा प्रस्तावित दौरा रद्द करण्यात आला आहे. त्यामुळे शिंदे आता करोनाचा ज्वर कमी झाल्यानंतर बैठक घेतील, अशी माहिती शिवसेनेच्या पदाधिकाऱ्यांकडून देण्यात आली आहे, तर त्यांचा दौरा रद्द झाल्यामुळे आता महापालिकेच्या आकृतिबंधासह महत्त्वाचे विषय पुन्हा लांबणीवर पडले आहेत.

चव्हाण, फडणवीसांच्या दौऱ्याकडे लक्ष

दरम्यान, शिंदे यांचा दौरा रद्द झाला असताना दुसरीकडे रविवारी (दि. २१) सार्वजनिक बांधकाममंत्री अशोक चव्हाण यांच्या उपस्थितीत काँग्रेसचीही बैठक होणार आहे. बैठकीत काँग्रेसकडून शक्तिप्रदर्शन केले जाणार आहे. माजी मुख्यमंत्री तथा विरोधी पक्षनेते फडण‌वीस यांचा सोमवारी नाशिकमध्ये दौरा असून, त्यांच्याकडून महापालिकेतील विविध कामांच्या उद्घाटनाचा बार वाजवला जाणार आहे. करोनाच्या वाढत्या प्रादुर्भावामुळे चव्हाण, फडणवीस यांच्या दौऱ्याकडे सर्वांचे लक्ष लागून आहे.