‘ते’ घडवताहेत व्हर्च्युअल नर्मदा परिक्रमा!

नाशिक ः धर्माचरण करणाऱ्या प्रत्येकाच्या मनात असलेले नर्मदा परिक्रमेचे स्वप्न आयुष्य उतरणीला लागल्यावर पूर्ण होते. मात्र, हे स्वप्न तत्काळ घरबसल्या पूर्ण होत असेल तर...! हे शक्य केले आहे नाशिकच्या विवेक वासुदेव दंडवते यांनी. दंडवते सध्या नर्मदा परिक्रमेसाठी गेले असून, ते फेसबुक लाइव्हच्या माध्यमातून दररोज अनेकांना व्हर्च्युअल परिक्रमा घडवत आहेत.

अध्यात्माकडे वळण्यासाठी आता वयाचे काही बंधन नाही. पूर्वी आयुष्याच्या सायंकाळी होणारी नर्मदा परिक्रमा आता तारुण्यातही होऊ लागली आहे. अनेक तरुण या वारीत सहभागी होऊ लागले आहेत. नर्मदा परिक्रमा हा अत्यंत पवित्र उत्सव असून, अनेक लोक त्याकडे आकर्षित होत आहेत. विविध लोकांना तसेच एका वेगळ्या संस्कृतीला भेटण्याची संधी यातून मिळते. त्यामुळे ही परिक्रमा करण्यासाठी आता अनेकजण उत्सुक असतात. परंतु, रोजच्या कामामुळे, व्यापामुळे तितका वेळ काढू न शकलेल्यांसाठी हा आनंद देण्याचे काम दंडवते आहेत. दंडवते गेल्याच महिन्यात परिक्रमेसाठी निघालेले आहेत. महिंद्रा अॅण्ड महिंद्रा कंपनीतून निवृत्त झालेल्या दंडवते यांना अध्यात्माची ओढ असून गणेशबाबांचे ते अनुयायी आहेत. याआधीही त्यांनी नर्मदा परिक्रमा केलेली आहे. यावेळच्या परिक्रमेमध्ये ते रोज फेसबुक लाइव्हवर एक व्ह‌िडीओ टाकतात. यात तेथील भागाची माहिती दिलेली असते. तसेच वाटेत येणारी अनेक मंदिरे, प्राचीन स्थळे यांचा परिचय ते अनेकांना करून देतात. त्यांच्या फेसबुक लाइव्हला असंख्य व्ह्यूज मिळत आहेत. कमेंटचाही पाऊस पडत असून, आमचे नर्मदा परिक्रमेचे स्वप्न या रूपाने पूर्ण होत असल्याचे अनेकांनी म्हटले आहे.

..ही परिक्रमेची पूर्वतयारीच!

विवेक दंडवते यांचा रोजचा व्हिडीओ फेसबूकवर कधी पडतो याची अनेकजण वाट पाहात असतात. एकप्रकारे नर्मदा परिक्रमेची पूर्वतयारीच ते अनेकांकडून करून घेत आहेत. त्यांच्यासोबत त्यांची पत्नीही असून, व्हिडीओ काढण्यात त्या दंडवते यांची मदत करतात. यासाठी रोज मुक्कामच्या जागी मोबाइल चार्ज करून घेणे त्यांना अनिवार्य असते. परिक्रमा आनंदात सुरू असून ते अध्यात्मिक समाधान देत आहेत. Vivek Vasudeo Dandwate या फेसबुक अकाऊंटवर हे लाइव्ह पाहता येईल.