बिटको ते जेलरोडदरम्यान दुभाजकातील झाडांना पाणी (लोगो म. टा. इम्पॅक्ट)
जेलरोड : बिटको ते जेलरोडदरम्यान दुभाजकांत असलेल्या झाडांना पाणी मिळत नसल्याने ती कोमेजू लागली होती. याबाबतचे वृत्त 'मटा'मध्ये प्रसिद्ध होताच महापालिकेचा उद्यान विभाग जागा झाला. नुकतेच या झाडांना टँकरद्वारे पाणी देण्यात आले. बिटको ते जेलरोडदरम्यानच्या दुभाजकांतील झाडे सुकू लागल्याने नागरिकांनी नाराजी व्यक्त केली होती. या झाडांना नियमितपणे पाणी देण्याची मागणी होत आहे.
उद्योजकता विकास शिबिर
नाशिक : बँक ऑफ महाराष्ट्रच्या महाबँक आरसेटीच्या वतीने उद्योजकता विकास व शेतकऱ्यांकरिता दि. ५ मेपासून तेरा दिवसांच्या मोफत शेळीपालन प्रशिक्षण शिबिराचे आयोजन करण्यात आले आहे. शिबिरातील प्रशिक्षणार्थींची निवड करण्यासाठी आज, शुक्रवारी (दि. २७) सकाळी ११ ते दुपारी ३ या वेळेत बँक ऑफ महाराष्ट्र, परशुराम साईखेडकर नाट्यगृहासमोर येथे मुलाखती होणार आहेत.
पथदीप बंदने गैरसोय (फोटो)
जेलरोड : जेलरोड परिसरातील मॉडेल कॉलनीतील बहुतांश पथदीप काही दिवसांपासून बंद आहेत. त्यामुळे परिसरातील रहिवाशांची गैरसोय होत असून, येथील बंद पथदीप त्वरित सुरू करण्याची मागणी नागरिकांनी केली आहे. येथे लहान मुले रात्री खेळतात. शेजारीच रुग्णायलय आहे. त्यातही वर्दळ असते. या रस्त्यावरून वाहने वेगाने धावत असतात. मात्र, पथदीप बंद असल्याने अपघातांची भीती वाढली आहे. या कॉलनीतील अनेक पथदीप बंद असून, जे सुरू आहेत त्यांच्यावर झाडांटच्या फांद्या आल्याने पुरेसा प्रकाश पडत नाही. जेलरोड ते बिटकोदरम्यानही अनेक पथदीप बंद आहेत. ते त्वरित सुरू करण्याची मागणी होत आहे.
आजपासून राष्ट्रीय परिषद
नाशिक : संदीप फांउडेशन संचालित संदीप इन्स्टिट्यूट ऑफ इंजिनीअरिंग अँड मॅनेजमेंट कॉलेजच्या कॉम्पुटर इंजिनीअरिंग विभागातर्फे आजपासून दोनदिवसीय राष्ट्रीय परिषदेस प्रारंभ होत आहे. 'रिसेंट ट्रेंडस इन सायबर इन्व्हेस्टिगेशन अँड फॉरेन्सिक' या विषयावर ही दोन दिवसीय परिषद होईल. त्यात प्राध्यापक आणि विद्यार्थी सहभाग घेऊ शकतात. परिषदेसाठी सायबर इनव्हेस्टिगेशन विभागाचे एस. पी. बालसिंग राजपूत, संरक्षण मंत्रालयाचे माजी मुख्य सायबर अधिकारी लेफ्टनंट कर्नल नरेशकुमार चौधरी, सरकारच्या सायबर सिक्युरिटी विभागातील अधिकारी आशिष सुतार, एस. खडसारे, पोलिस आयुक्त डॉ. रवींद्रकुमार सिंगल यांना आमंत्रित करण्यात आले आहे. यावेळी ते उपस्थितांना मार्गदर्शन करतील. सहभागाचे आवाहन संस्थचे अध्यक्ष डॉ. संदीपकुमार झा, प्राचार्य डॉ. रवींद्र क्षीरसागर, विभागप्रमुख डॉ. कामिनी नलावडे यांनी केले आहे.
इंटरनेट सेवा विस्कळीत (इंटरनेटची इमेज)
जेलरोड : नाशिकरोडसह जेलरोड परिसरात मोबाइलधारकांना 'फोर जी'ची रेंजच उपलब्ध होत नसल्याने संताप व्यक्त होत आहे. बहुतांश मोबाइल कंपन्यांनी सध्याच्याच दरामध्ये 'फोर जी' सेवा दिली आहे. परंतु, सेवा सुरू झाल्यावर 'टू जी'चीच रेंज मिळत असल्याचा अनुभव मोबाइलधारकांचा येत आहे. त्यामुळे कंपन्यांनी फसवणूक केल्याचा आरोप अनेकांकडून केला जात आहे. जेलरोडला संगणकाची इंटरनेट सेवाही व्यवस्थित मिळत नसल्याच्या तक्रारी वाढल्या आहेत. त्यामुळे व्यावसायिक, विद्यार्थी यांना अडचणींना तोंड द्यावे लागत आहे.
प्रा. जाधव यांना पीएच.डी.
नाशिक : केटीएचएम महाविद्यालयातील वनस्पतिशास्र विभागातील प्रा. सचिन जाधव यांना डॉ. बाबासाहेब आंबेडकर मराठवाडा विद्यापीठाची पीएच.डी. प्राप्त झाली आहे. त्यांनी 'आयसोलेशन अँड मॉलिक्युलर कॅरेक्टरायझेशन ऑफ अल्टरनारिया स्पेसिज कॉझिंग डिसिजेस इन टोमॅटो अँड कॅप्सिकम' या विषयावर प्रबंध सादर केला होता. त्यांना डॉ. एम. एस. वाडीकर यांचे मार्गदर्शन लाभले. या यशाबद्दल संस्थेच्या सरचिटणीस नीलिमा पवार, अध्यक्ष डॉ. तुषार शेवाळे, सभापती माणिकराव बोरस्ते, उपसभापती राघो आहिरे आदींसह शिक्षणाधिकारी डॉ. डी. डी. काजळे, डॉ. आर. डी. दरेकर, प्राचार्य डॉ. व्ही. बी. गायकवाड, वनस्पतिशास्त्र विभागप्रमुख डॉ. एम. डी. सोनवणे यांनी त्यांचे अभिनंदन केले आहे.