नस्तनपूरला आज यात्रोत्सव

म. टा. वृत्तसेवा, मनमाड

शनी महाराजांच्या साडेतीन पीठांपैकी एक मानल्या जाणाऱ्या व प्रभू रामचंद्रांनी स्थापना केलेल्या नस्तनपूर येथील शनी मंदिरात शनी अमावस्येनिमित्त शनिवारी यात्रोत्सव होत आहे. या उत्सवाची संपूर्ण तयारी पूर्ण झाली असून, लाखो भाविक हजेरी लावतील, असा अंदाज आहे.

उत्सवनिमित्ताने किल्ला, मुख्य प्रवेशद्वार अशा दोन ठिकाणी वाहनतळाची निर्मिती करण्यात आली आहे. आमंत्रित पाहुण्यांच्याहस्ते तसेच पंढरपूरच्या धर्तीवर (प्रायोगिक तत्वावर) दर्शन रांगेतील आरतीच्या वेळी उपस्थित असणाऱ्या शनिभक्ताला सपत्नीक महापूजेचा व आरतीचा मान मिळणार आहे. नंतर प्रसाद वाटप करण्यात येणार आहे. बाहेरगावाहून येणाऱ्या भाविकांसाठी मुक्कामी राहण्यासाठी स्वतंत्र कक्ष, यात्रा उत्सवात येणाऱ्या अडीअडचणी सोडविण्यासाठी तक्रार निवारण कक्ष उभारण्यात आला असल्याचे मंदिर ट्रस्ट अध्यक्ष माजी आमदार अॅड. अनिल आहेर यांनी कळविले आहे.