युवकांनीच अखेर केली डागडुजी

म. टा. वृत्तसेवा, कळवण

अनेकदा तक्रारी करून, निवेदन देवूनही सार्वजनिक बांधकाम खाते कळवण शहरातील मेन रोडवरील खड्डे बुजवण्याकडे कानाडोळा करीत असल्यामुळे शहरतील काही व्यापारी, सामाजिक कार्यकर्त्यांनी पुढाकार घेत स्वखर्चाने या रस्त्यांची डागडुजी सुरू केली आहे. मुरूम टाकून हे खड्ड्ये बुजव‌ण्यिात आले. कळवणच्या या युवकांच्या गांधीगिरीचे सर्वत्र कौतुक होत आहे.

कळवण शहराचा मुख्य आत्मा असलेल्या मेनरोडवर ठिकठिकाणी मोठ्या प्रमाणात खड्डे पडले आहेत. त्यामुळे वाहनधारकांना मोठ्या दिव्यातून वाट काढली लागते. खड्ड्यांमुळे छोटे मोठे अपघात तर नित्याचेच झाले आहेत. रात्री या रस्त्यांवर प्रवास करणे म्हणजे शारीरिक दुखापतीला आमंत्रण देणे. रात्री फिरायला येणाऱ्या नागरिक महिलांना या खड्ड्यातून चालणे दुरापास्त झाले आहे.

नवीन रस्ता झाला नाही तरी चालेल मात्र डागडुजी तर करा अशी मागणी अनेकदा करूनही बांधकाम विभागाला जाग आली नाही. शेवटी कळवण मधील साहेबराव पगार, अजय मालपुरे, मोत‌रिाम पगार, शरद पगार, मोयोद्दीन शेख, बाजीराव पगार, मनीष पगार, किरण पगार आदींनी परिश्रम घेत या रस्त्यावर स्वखर्चाने मुरूम टाकला. या युवकांच्या उपक्रमाचे शहरातील नागरिकांसह वाहन चालकांनी कौतुक केले आहे.