म. टा. वृत्तसेवा नाशिकरोड
काका...दादा...भाऊ...मद्यपान करून ड्रायव्हिंग केले, तर नवीन कायद्यातील तरतुदींनुसार मोठा दंड चुकवावा लागेल. त्याहीपेक्षा आपला जीव मोलाचा आहे. तुमच्या कुटुंबासाठी तुम्ही महत्त्वाचे आहात...अशा शब्दांत पोलिसांकडून ड्रंक अँड ड्राइव्ह मोहिमेदरम्यान वाहनचालकांचे समुपदेशन करण्यात आले. एरव्ही दोनचार शिव्या हासडणाऱ्या पोलिसांच्या तोंडून हे शब्द ऐकायला मिळाल्याने वाहनचालकांना आश्चर्याचा धक्काच बसला. पोलिस उपनिरीक्षक जयेश गांगुर्डे, सहाय्यक पोलिस उपनिरीक्षक जी. के. शेलार, धनाजी माळोदे, एन. एम. वडघुले, सोमनाथ जाधव, व्ही. डी. अवचार यांच्या पथकाने नाशिकरोड पोलीस ठाण्याच्या समोरच उड्डाणपचलाखाली ड्रंक अँड ड्राइव्ह मोहीम राबविली. या मोहिमेत मंगळवारच्या कारवाईप्रमाणे एकही केस दाखल झाली नाही. परंतु वाहनचालकांना पोलिसांचे दुसरेच रूप बघायला मिळाले. या मोहिमेदरम्यान वाहनचालकांना थांबवून त्यांची अल्कोहोल तपासणी यंत्राद्वारे तपासणी करतांना या पथकातील पोलिस कर्मचारी त्यांचे समुपदेशन करताना दिसून आले.
ड्रंक अँड ड्राइव्ह करताना आढळून येणाऱ्या वाहनचालकांना कायद्यातील तरतुदीनुसार आता मोठा दंड भरण्याची शिक्षा आहे. परंतु केवळ दंड भरण्याची भीती बाळगण्यापेक्षा आपला जीव अनमोल असून आपण आपल्या कुटुंबासाठीदेखील तो मोलाचे असतो याची जाणीव ठेवा, अशा शब्दांत या कारवाई कामी रस्त्यावर उतरलेल्या पोलिसांच्या पथकाकडून वाहनचालकांचे समुपदेशन केले गेले. अनेक वाहन चालकांकडून पोलिसांच्या या कारवाईबाबत समाधानही व्यक्त केले गेले.