देवळालीत सैन्यभरती
ट्रेडमन आणि सैनिक पदासाठी उद्यापासून चाचणी; परराज्यांतून युवक दाखल
म. टा. वृत्तसेवा, देवळाली कॅम्प
देवळाली लष्कर छावणीतील टेरॉटोरियल आर्मी (TA) थल सेना ११६ इंफ्रट्री बटालियनमध्ये सैनिक व ट्रेडमनच्या विविध पदांसाठी उद्यापासून (१६ डिसेंबर) भरती प्रक्रिया राबविण्यात येणार आहे. या भरतीसाठी देवळालीत परराज्यातून युवक दाखल होण्यास सुरुवात झाली आहे. वेबसाइटवर भरती सुरू होण्याची तारीख १५ डिसेंबर देण्यात आल्याने अनेक युवक शुक्रवारपासूनच शहरात दाखल झाले. यामुळे त्यांची राहण्यासाठी व जेवणासाठी तारांबळ उडाल्याचेही चित्र होते.
वरील तारखेनुसार संबंधित भागातील उमेदवारांना आधी देवळालीच्या आनंद रोड मैदानावर असलेल्या शिवसेनाप्रमुख बाळासाहेब ठाकरे क्रीडा संकुल येथे एकत्रित करण्यात येणार आहे. ज्यामुळे उमेदवारांची होणारी गैरसोय टाळता येणार आहे. या भरतीमध्ये रविवारी सकाळी ६ वाजता धोंडीरोडवरील टीए पॅराच्या मैदानावर प्रत्यक्ष भरती प्रक्रिया सुरू होणार आहे. या दिवशी आंध्रप्रदेश, गुजरात, केरळ, तामिळनाडू, राजस्थान, कर्नाटक, गोवा त्याचप्रमाणे दादरा नगर हवेली, दीव दमण, लक्षद्वीप आणि पाँडिचेरी येथील उमेदवार, तर सोमवारी (१७ डिसेंबर) नाशिक वगळता महाराष्ट्रातील अन्य जिल्ह्यातील उमेदवारांना सहभागी होता येणार आहे. मंगळवारी (१८ डिसेंबर) केवळ नाशिक जिल्ह्यातील उमेदवारांना सहभागी होता येणार आहे.
---
टॅटू नको
भरतीत सहभागी होणाऱ्या उमेदवारांच्या हाताऐवजी अन्य कोणत्याही अवयवावर कुठल्याही प्रकारचा टॅटू किंवा गोंदलेले असल्यास भरतीमध्ये सहभागी होऊ नये, असे लष्कराकडून स्पष्ट करण्यात आले आहे. तळहाताच्या मागील बाजूस असलेल्या पुष्ठभागावर व हाताच्या कोपऱ्यापासून तळहातापर्यंत आतील बाजूस गोंदलेले किंवा टॅटू असेल तर तो चालणार आहे. भरतीदरम्यान कुठल्याही प्रकारचे अनुचित व गैरवर्तन उमेदवाराकडून होणार नाही याची दखल घेण्याच्या सूचनाही देण्यात आल्या आहेत.
---------------
भारत पेट्रोलियमतर्फे मशीन ऑपरेटरसाठी प्रशिक्षण
कॉलेज क्लब रिपोर्टर, नाशिक
भारत सरकार आणि भारत पेट्रोलियम कॉर्पोरेशन लिमिटेड यांच्या संयुक्त विद्यमाने कॉर्पोरेट सोशल रिस्पॉन्ससीबीलिटी अर्थात सीएसआर योजनेअंतर्गत विनामूल्य निवासी रोजगाराभीमुख प्रशिक्षण कार्यक्रम आयोजित करण्यात आला आहे. सरकारच्या स्किल इंडिया योजनेअंतर्गत हे प्रशिक्षण होणार आहे. २० डिसेंबर रोजी औरंगाबादच्या सेंटर फॉर स्कीलिंग अॅण्ड टेक्निकल सपोर्ट येथे प्रत्यक्ष मुलाखत घेतली जाणार आहे. भारत सरकारच्या रसायन आणि उर्वरक मंत्रालयाद्वारे सहा महिन्याचा प्रशिक्षण कालावधी असणार आहे. औरंगाबादच्या सेंटर फॉर स्कीलिंग अँड टेक्निकल सपोर्ट अर्थात सीपेट येथे प्रशिक्षण दिले जाणार आहे. मशीन ऑपरेटर याविषयी सहा महिने विद्यार्थ्यांना मोफत प्रशिक्षण दिले जाणार आहे. प्रशिक्षण पूर्ण झाल्यानंतर प्रशिक्षणार्थींना देशातील विविध प्लास्टिक क्षेत्रात काम करण्याची संधी मिळणार आहे. अधिक माहितीसाठी विद्यार्थ्यांनी www.cipet.gov.in किंवा ०२४०-२४७८३१६/१७ येथे संपर्क साधण्याचे आवहन करण्यात आले आहे.