म. टा. खास प्रतिनिधी, नाशिक
जिल्हा परिषदेच्या अध्यक्ष, उपाध्यांची निवडणूक २ जानेवारीला होणार असल्यामुळे महाविकास आघाडीचे जिल्हा परिषद सदस्य सहलीला जाणार आहेत. येत्या एक-दोन दिवसात ही सहल निघणार असून, त्यातच या आघाडीचा फॉर्म्युला ठरणार आहे. अध्यक्षपद हे शिवसेनेला निश्चित असून, उपाध्यक्षपद हे राष्ट्रवादीला मिळणार आहे.
जिल्हा परिषदेतील एकूण ७२ सदस्यांपैकी शिवसेना २५, राष्ट्रवादी १५, काँग्रेस ८ असे महाआघाडीचे ४८ सदस्य आहेत. यातील सर्व सदस्य सहलीला जाणार आहेत. त्यांच्याबरोबरच माकप ३, अपक्ष ६ यातील किती सदस्य असतील हे अद्याप निश्चित नाही. गेले दोन ते तीन दिवस या निवडणुकीबाबत जोरदार हालचाली झाल्या. गुरुवारी राष्ट्रवादीचे नेते छगन भुजबळ व शिवसेनेचे नेते संजय राऊत हे नाशिकला आले. त्यानंतर या हालचालींना वेग आला आहे. या आघाडीची ही सहल पहिल्यांदा एकत्र जाणार असल्यामुळे ती आता कुठे मुक्कामाला जाते हे सर्वांसाठी औत्सुक्याचे असणार आहे.