एकूण घरे - १००१
ईडब्ल्यूएस - २८३
अल्प उत्पन्न - ५००
मध्यम उत्पन्न - २१६
उच्च उत्पन्न - २
म. टा. विशेष प्रतिनिधी, मुंबई
कोकण मंडळ तसेच सिडकोच्या लॉटरीनंतर आता म्हाडाची मुंबईतील घरांसाठी लॉटरी निघणार आहे. त्यामुळे मालकी हक्काच्या घराचे स्वप्न पाहणाऱ्यांना एकप्रकारे दिवाळीची भेट मिळणार आहे. १००१ घरांसाठी ऑक्टोबर किंवा नोव्हेंबरमध्ये म्हणजेच दिवाळीपूर्वी लॉटरी काढली जाणार आहे.
कोकण मंडळातील विजेत्यांची लॉटरी शनिवारी वांद्रे येथील म्हाडाच्या मुख्यालयात काढण्यात आली. त्यावेळीच गृहनिर्माणमंत्री प्रकाश मेहता यांनी म्हाडाच्या मुंबई मंडळाच्या लॉटरीची घोषणा केली. त्यासाठीची प्रशासकीय प्रक्रिया पूर्ण झाल्याची माहिती मुंबई मंडळाचे मुख्य अधिकारी दीपेंद्र कुशवाह यांनी दिली. लॉटरीची जाहिरात सप्टेंबरच्या पहिल्या सप्ताहात केली जाईल. त्यानंतर अर्ज व अनामत रक्कम भरणे, अर्जांची छाननी व प्रत्यक्ष सोडत या प्रक्रियेसाठी ३० ते ४५ दिवसांचा कालावधी गृहित धरल्यास ऑक्टोबरअखेर घरांचे वाटप होईल. १००१ घरांपैकी २८३ घरे ही आर्थिकदृष्ट्या कमकुवत गटासाठी असतील. तर अल्प उत्पन्न गटासाठी ५०० व मध्यम उत्पन्न गटासाठी २१६ घरे असतील. उच्च उत्पन्न गटासाठी फक्त दोनच घरे आहेत.