म. टा. वृत्तसेवा, सांगली
शहर सुरक्षिततेसाठी पोलिस दलाने केलेल्या आवाहनाला गणेशोत्सव मंडळांनी उत्स्फुर्त प्रतिसाद दिला आहे. सांगली-मिरजेतील २२ मंडळांनी शहरात 'सीसीटीव्ही' बसविण्यासाठी पुढाकार घेतला आहे. त्यापैकी काहींनी धनादेश सुपूर्द केले असून, मिरजेतील दहा मंडळे शनिवारी सीसीटीव्ही देणार असल्याची माहिती पोलिस अधीक्षक सुहैल शर्मा यांनी पत्रकार परिषदेत दिली. या वेळी अप्पर पोलिस अधीक्षक शशिकांत बोराटे, स्थानिक गुन्हे अन्वेषणचे निरीक्षक श्रीकांत पिंगळे उपस्थित होते.
गणेशोत्सवात मोठ्या आवाजाच्या ध्वनी यंत्रणेला फाटा देऊन सामाजिक कार्यासाठी पुढाकार घ्यावा, असे आवाहन पोलिस दलातर्फे करण्यात आले होते. गेल्यावर्षी या आवाहनाला प्रतिसाद देत अनेक मंडळांनी पुढाकार घेतला. त्यातून दोन बंधारे बांधण्यात आले. यंदाच्या वर्षी पोलिस दलाने शहर सुरक्षिततेसाठी आवाहन केले. त्यालाही सांगली-मिरजेसह जिल्ह्यातील मंडळांनी प्रतिसाद दिला आहे.
अधीक्षक शर्मा म्हणाले, 'शहरात सद्यस्थितीत ८० सीसीटीव्ही कॅमेरे बसवण्यात आले आहेत. त्या माध्यमातून अनेक गंभीर गुन्हे उघडकीस आले आहेत. परंतु, अंतर्गत रस्त्यांसह वर्दळीच्या ठिकाणी 'सीसीटीव्ही'ची गरज आहे. त्यासाठी पोलिस दलाला आणखी १२० सीसीटीव्हींची गरज असून, मंडळांनी उत्स्फुर्तपणे पुढाकार घेतला आहे.'
दरम्यान, अनंत चतुर्दशीसाठी पोलिस यंत्रणा सज्ज झाली असून, जिल्ह्यातील पोलिसांसह ७०० होमगार्ड, एसआरपीएफ, आरसीपी यांच्यासह ३७० विशेष पोलिस अधिकाऱ्यांचा बंदोबस्त असेल, असे शर्मा यांनी सांगितले.