म. टा. प्रतिनिधी, मुंबई
सध्या डॉलरच्या तुलनेत भारतीय रुपयाचे अवमूल्यन होण्यास सत्ताधारी भाजप व त्यांना राजकीय सल्ला देणारा राष्ट्रीय स्वयंसेवक संघच जबाबदार असल्याचा आरोप करुन, आमची लढाई ही भाजप व रा. स्व. संघाशीच आहे. त्यासाठीच ओवेसी बंधूंच्या एमआयएमसोबत युती केली असे भारिप बहुजन महासंघाचे अध्यक्ष प्रकाश आंबेडकर यांनी गुरुवारी मुंबईत सांगितले. त्याचवेळी महाराष्ट्रात काँग्रेसने पराभूत झालेल्या २२ लोकसभेच्या जागांपैकी १२ जागा आम्हांला द्याव्यात, अशी नवीन मागणी त्यांनी केली.
डॉलरच्या तुलनेत भारतीय रुपयाची घसरण होण्यास रा. स्व. संघ आणि भाजपची धोरणे जबाबदार आहेत, असा आरोप आंबेडकर यांनी केला. व्यापार, धंदा व अन्य मार्गाने संपत्ती कमावणारी ३ लाख ३ हजार ४०० कुटुंबे देशाच्या ५० टक्के संपत्तीचे मालक आहेत. त्यापैकी सुमारे ७५ हजार कुटुंबे भारतीय चलन डॉलरमध्ये रुपांतरित करून परदेशात वास्तव्यासाठी जात आहेत. अन्य देशात स्थलांतरित होणारी बहुतांश कुटुंबे हे हिंदूच आहेत. अशा लोकांमुळेच डॉलरची मागणी वाढली असून, चुकीच्या आर्थिक धोरणाच्या भीतीपोटी देश सोडून जाणाऱ्यांची संख्या भविष्यात वाढणार आहे असे भाकित त्यांनी केले.
काँग्रेससोबत जाण्याची तयारी
भारतीय जनता पक्षाला फायदा करण्यासाठी आम्ही एमआयएमसोबत राजकीय मैत्री केल्याचे विरोधकांचे आरोप त्यांनी फेटाळून लावले. भाजपला सत्तेतून घालविण्यासाठी आम्ही काँग्रेससोबत आघाडी करण्याचा विषय समोर आणला, त्यासाठी दोन बैठकाही झाल्या. २००४ पासून काँग्रेस उमेदवार पराभूत होत असलेल्या २२पैकी १२ लोकसभा मतदारसंघाच्या जागा आम्ही मागितल्या आहेत. त्यानंतर काँग्रेसचा फोन येणे बंद झाल्यामुळे एमआयएमशी युती केली. अजूनही आपण काँग्रेससोबत जाण्यास तयार असल्याचे आंबेडकर यांनी पुन्हा एकदा स्पष्ट केले. राफेल विमान खरेदी सौद्याबाबत काँग्रेस नेते राहुल गांधी यांच्याविरोधात राष्ट्रवादीचे नेते शरद पवार भूमिका मांडत आहेत. त्यामुळे काँग्रेसने राष्ट्रवादीसोबत जाता कामा नये, असेही ते म्हणाले.