म. टा. वृत्तसेवा, नवी मुंबई
नवी मुंबई आंतरराष्ट्रीय विमानतळबाधित दहा गावांतील विशेषतः उलवे, कोंबडभुजे, तरघर आणि अन्य गावांतील बांधकामांना तसेच कुलदैवत मंदिर, खासगी मंदिर यांचे चलतचित्रण करण्यात आलेल्या बांधकामाच्या तक्रारींचा प्राधान्याने निपटारा करण्यासाठी तसेच प्रकल्पग्रस्तांच्या अन्य प्रलंबित प्रकरणांवर निर्णय घेण्यासाठी त्रिसदस्यीय समिती स्थापन करण्याचा निर्णय सिडकोने घेतला आहे.
ही त्रिसदस्य समिती सेवानिवृत्त आयएएस सुबोधकुमार यांच्या अध्यक्षतेखाली गठित करण्यात आली असून या समितीत सिडकोचे अतिरिक्त मुख्य भूमि व भूमापन अधिकारी (नमुंआवि) व अतिक्रमणविरोधी विभागाचा प्रमुख हे सदस्य असतील. या समितीत स्थानिक प्रकल्पग्रस्त समितीच्या प्रतिनिधींचा व संबंधित गावाच्या प्रतिनिधी यांचा आवश्यकतेप्रमाणे समावेश केला जाईल. बांधकामांचे चलतचित्रण झालेले बांधकामाबाबतचे पुरावे तपासून निर्णय घेतला जाणार आहे.