'त्यांना' सोडणार नाही; आदेश 'भावोजी' भडकले

मटा ऑनलाइन वृत्त । उरण

पनवेल महानगरपालिकेच्या पहिल्यावहिल्या निवडणुकीत शिवसेनेला भोपळाही फोडता न आल्यानं टीकेचे धनी ठरलेले आदेश बांदेकर भ्रष्टाचाराच्या आरोपांमुळे चांगलेच भडकले आहेत. ज्यांनी शिवसेना नेत्यांवर खोटे आणि बिनबुडाचे आरोप केलेत, त्यांना मी सोडणार नाही, असा इशाराच त्यांनी उरण येथील एका कार्यक्रमात दिला.

शिवसेनेनं गेल्या २५ वर्षांत रायगड जिल्ह्यातील कुठलीच निवडणूक स्वबळावर लढवली नव्हती. परंतु, भाजपशी काडीमोड झाल्यानंतर पक्षप्रमुख उद्धव ठाकरे यांनी 'एकला चालो रे'चा नारा दिलेला असल्यानं, पनवेल महापालिकेच्या निवडणुकीत कुणाशीही युती न करता शिवसेना स्वबळावर रिंगणात उतरली होती. आदेश बांदेकर यांच्याकडे पक्षानं निवडणुकीची जबाबदारी सोपवली होती. पण, पनवेलमध्ये सेनेचा दारूण पराभव झाला. त्यांना एकही जागा जिंकता आली नाही. स्वाभाविकच, आदेश भावोजी टीकेचे लक्ष्य झाले होते.

काही तरुण शिवसैनिकांनी तर आदेश बांदेकर यांच्यावर भ्रष्टाचाराचा आरोप केला होता. बांदेकर यांनी शेतकरी कामगार पक्षाचे नेते विवेक पाटील यांच्याशी हातमिळवणी केली आणि निवडणुकीतील कमाईतून फॉर्च्युनर कार विकत घेतली, असा आरोप त्यांनी सोशल मीडियावरून केला होता. त्याबाबत बरेच दिवस मौन बाळगणाऱ्या बांदेकर यांच्या रागाचा सोमवारी उद्रेक झाला. ज्याने कुणी हा संदेश पसरवला त्याला मी सोडणार नाही, नवी मुंबई पोलीस आयुक्त हेमंत नगराळे यांच्याशी माझी चर्चा झाली असून पोलीसच योग्य ती कायदेशीर कारवाई करतील, असं त्यांनी बजावलं. त्यामुळे आता स्थानिक तरुण शिवसैनिक विरुद्ध बांदेकर यांच्यातील वाद आणखी वाढण्याची चिन्हं आहेत.