अंधेरी पुलाबाबत सुरक्षा आयुक्तांचा अहवाल
म. टा. खास प्रतिनिधी, मुंबई
अंधेरीतील गोखले उड्डाणपुलाजवळील पादचारी पुलास मोठ्या प्रमाणात गंज लागला असून हा पुलाचा भाग कमकुवत होत असतानाच त्यावर केबल, पेव्हरब्लॉक, मातीचाही भार पडला, असे पश्चिम रेल्वेच्या मुख्य सुरक्षा आयुक्तांनी आपल्या अहवालात म्हटले आहे. या पुलाची क्षमता २८० टन इतकी असताना त्यावरील जादा भार १२४ टनांवर होता. त्यात मातीचा भार सर्वाधिक म्हणजे ६६ टन, पेव्हर ब्लॉकचा भार २७ टन असल्याचेही समोर आले आहे.
या पुलाची बांधणी या अतिरिक्त भाराच्या अनुषंगाने झाली नव्हती, असा गंभीर आक्षेपही नोंदवण्यात आला आहे. त्यात मुंबई महापालिकेची चूक असल्याचेही रेल्वे सुरक्षा आयुक्तांनी स्पष्टपणे म्हटले आहे. महापालिकेने केबल, पेव्हरब्लॉक, मातीचे थर वाढवताना त्याबाबत पश्चिम रेल्वेकडून कोणतीही परवानगी घेतली नव्हती, असा उल्लेख केला आहे.
हा अहवाल रेल्वेस सादर झाल्याने आता त्यातील ठपक्यांच्या अनुषंगाने दोषी अधिकारी, कर्मचाऱ्यांवर कारवाई होण्याचा मार्ग मोकळा झाला आहे. या पुलाची जबाबदारी रेल्वे, महापालिकेशी संबंधित असल्याने दुर्घटनेनंतर लागलीच कोणावरही कारवाई झाली नव्हती. पण, आता प्रामुख्याने पूल विभागातील इंजिनीअरना त्याची झळ बसेल, असा अंदाज मांडला जात आहे.
पादचारी पुलाची क्षमता २७९.५५ टन
त्यावर अतिरिक्त भार १२४.०७ टन वजन
त्यातील मातीचा भार ६६.१६ टन
पेव्हर ब्लॉक २७.६८ टन
अतिरिक्त केबल, डक्टचा भार ६.९७ टन
पुलावर साधारण ४४.४ टक्के जादा भार होता. त्यामुळे ३७.६ टक्के इतका भाग वाकला गेला.