आदिवासी नेत्याचा वसतिगृहप्रवेश रद्द

खांदा कॉलनी वसतिगृह प्रकरण

म. टा. वृत्तसेवा, पनवेल

खांदा कॉलनी येथील आदिवासी वसतिगृहात नियमबाह्य प्रवेश घेऊन राहणाऱ्या सुनिल तोटावाड या स्वयंघोषित नेत्याचा वसतिगृह प्रवेश रद्द करण्याचे आदेश गृहपालांना देण्यात आले आहेत. एकात्मिक आदिवासी विकास प्रकल्प, पेणचे प्रकल्प अधिकारी यांनी गुरुवारी या आदेशाने पत्र काढले. सुनिल तोटावाड या विद्यार्थ्याविरोधात तक्रार करणाऱ्या आदिवासी आदिम कातकरी संघटनेलादेखील पत्र पाठवून याची माहिती देण्यात आली आहे.

खांदा कॉलनी वसतिगृहात राहण्यासाठी सुनिल तोटावाड या विद्यार्थ्याने वेगवेगळ्या शैक्षणिक कारणासाठी प्रवेश घेतला होता. वसतिगृहात राहून विद्यार्थ्यांना एकत्र करून नेता ही बिरूदावली लावून तोटावाड हा विद्यार्थी नियमबाह्य पद्धतीने राहत असल्याची, तसेच त्याचा आदिवासी जातीचा दाखला बोगस असल्याची तक्रार आदिवासी आदिम कातकरी संघटनेने पेण प्रकल्प अधिकाऱ्यांकडे केली होती. या प्रकाराची चौकशी करण्यासाठी पेण प्रकल्प अधिकारी गजेंद्र केंद्रे यांनी चौकशी समिती नेमली होती. दोन महिन्यांपासून सुरू असलेल्या चौकशीत अखेर सत्य समोर आले. सुनिल तोटावाड या विद्यार्थ्याने वसतिगृहात व्यावसायिक अभ्यासक्रमासाठी दोनदा प्रवेश घेतल्याचे चौकशी समितीच्या निदर्शनास आले. त्यामुळे तोटावाडसह इतर विद्यार्थ्यांचे असे प्रवेश रद्द करण्याचे आदेश केंद्रे यांनी गृहपाल राजेंद्र घरत यांना दिले आहेत.

याशिवाय तोटावाड याने पनवेल तालुक्यातील माळडुंगे ग्रामपंचायतीचा बोगस रहिवासी दाखला वापरून २०१३-१४मध्ये आदिवासी विकास विभागाच्या योजना राबवल्या होत्या. या योजनाच बोगस असल्याचे उघड झाल्याचे पेण प्रकल्प अधिकाऱ्यांनी पत्रात म्हटले आहे. त्यामुळे योजनेचे साहित्य तत्काळ साहित्य कार्यालयात जमा करण्याचे आदेश दिले आहेत. आदिवासी विद्यार्थी कृती समिती स्थापन करून प्रशासनावर दबाव ठेवून गैरकृत्य करणाऱ्या तोटावाड याचा वसतिगृह प्रवेश रद्द होणार असल्याने ठाणे, रायगड जिल्ह्यातील वसतिगृहातील विद्यार्थ्यांना धक्का बसला आहे.

जातीच्या दाखल्याचा अहवाल अप्राप्त

सुनिल तोटावाड याचा जातीचा दाखला बोगस असल्याचा आक्षेप आदिवासी आदिम कातकरी संघटनेने घेतला होता. त्यानुसार चौकशी समितीने त्याच्या जातीच्या दाखल्याबाबत नांदेड जिल्ह्यातील भोकर येथील उपविभागीय अधिकाऱ्यांना अहवाल मागितला आहे. मात्र त्यांच्याकडून अद्याप अहवाल प्राप्त झाला नसल्याचे पत्रात प्रकल्प अधिकाऱ्यांनी म्हटले आहे.

अनेक वर्षे वसतिगृहात राहून जागा अडविणाऱ्या सुनिल तोटावाड या विद्यार्थ्यामुळे अनेक विद्यार्थ्यांचे नुकसान झाले आहे. उशिरा का होईना, प्रकल्प कार्यालयाकडून आमच्या मागणीला न्याय मिळाला आहे. जातीच्या दाखल्याचा अहवाल बाहेर आल्यास अजूनही सत्य बाहेर येईल.

दामू मौळे, माजी विद्यार्थी खांदा कॉलनी आदिवासी मुलांचे वसतिगृह