महिला वकिलाची ऑनलाइन फसवणूक

नवी मुंबई: ऑनलाइन फसवणूक करणाऱ्या एका टोळीने उलवे भागात रहाणाऱ्या एका महिला वकिलाकडून क्रेडिट कार्डाच्या माहितीसह ओटीपी नंबरची माहिती मिळवून या महिलेच्या क्रेडिट कार्डावरून सुमारे ९० हजार रुपयांची रोख रक्कम परस्पर दुसऱ्या बँक खात्यात वळती करून फसवणूक केल्याचा प्रकार उघडकीस आला आहे. एनआरआय पोलिसांनी या प्रकरणातील अज्ञात महिलेविरोधात फसवणुकीसह आयटी अॅक्टनुसार गुन्हा दाखल केला आहे.

उलवे सेक्टर २३ भागात राहणाऱ्या या महिला वकिलाने ११ सप्टेंबर रोजी एसबीआय बँकेचे क्रेडिट कार्ड घेतले होते. मात्र हे क्रेडिट कार्ड सुरू झाले नव्हते. मात्र १३ सप्टेंबर रोजी पूजा शर्मा नामक महिलेने एसबीआय बँकेतून बोलत असल्याचे सांगून तक्रारदार महिला वकिलाशी संपर्क साधला. तसेच, त्यांनी दोन दिवसांपूर्वी घेतलेले क्रेडिट कार्ड सुरू करण्याच्या बहाण्याने महिला वकिलाकडून तिच्या नव्या एसबीआय क्रेडिट कार्डाचे तसेच तिच्या कोटक महिंद्रा बँकेच्या क्रेडिट कार्डाचे सिक्युरिटी कोड, ओटीपी व सीव्हीव्ही क्रमांकाची माहिती घेतली. त्यानंतर तिच्या दोन्ही बँकेच्या क्रेडिट कार्डातून सुमारे ९० हजारांची रोख रक्कम मोबीक्विक डॉट कॉम या लिंकद्वारे ऑनलाइन दुसऱ्या खात्यात वळती केली.

या कालावधीत महिला वकील पतीसोबत खरेदी करण्यात व्यग्र असल्याने तिच्या मोबाइलवर रोख रक्कम वळती झाल्याचे आलेले मेसेज तिच्या वाचनात आले नाहीत. मात्र एसबीआय बँकेकडून तिच्या खात्यातून रोख रक्कम वळती झाल्याचे सांगण्यात आल्यानंतर तिने मोबाइलवर आलेले मेसेज पाहिले. त्यानंतर आपली फसवणूक झाल्याचे महिला वकिलाच्या लक्षात आले. त्यानंतर तिने एनआरआय पोलिस ठाण्यात तक्रार दाखल केली. त्यानुसार पोलिसांनी अज्ञात महिलेविरोधात फसवणूक व आयटी अॅक्टनुसार गुन्हा दाखल करून तपासाला सुरुवात केली आहे.