म. टा. विशेष प्रतिनिधी, मुंबई
'...आणि डॉ. काशिनाथ घाणेकर' या मराठी चित्रपटाला डावलून हिंदी चित्रपटांना प्राधान्य देणाऱ्या मल्टिप्लेक्स थिएटर मालकांना मनसेने हा अन्याय २४ तासांत दूर करत प्राइम टाइम दिला नाही, तर मनसेस्टाइलने आंदोलन करू, असा इशारा दिला होता. त्यानंतर लगेचच याची दखल घेत मल्टिप्लेक्स थिएटरमध्ये या चित्रपटाच्या शोसाठी प्राइम टाइम देण्यात आला आहे.
दिवाळीच्या सुट्टीमध्ये 'डॉ. काशिनाथ घाणेकर' हा मराठी चित्रपट प्रदर्शित झाला असून त्याच्यासोबत हिंदी चित्रपटही प्रदर्शित झाले आहेत. मात्र या चित्रपटाला डावलत केवळ हिंदी चित्रपटाला प्राधान्य देण्यात आले आहे. याची दखल घेत मनसेच्या चित्रपट सेनेचे प्रमुख अमेय खोपकर यांनी हा अन्याय दूर न केल्यास आंदोलनाचा इशारा दिला होता. त्याला लागलीच प्रतिसाद देत या चित्रपटाला मल्टिप्लेक्समध्ये महत्त्वाच्या वेळा देण्यात आल्या आहेत. या चित्रपटात काम करणारे अभिनेते सुबोध भावे हे शिवसेनेच्या चित्रपट सेनेशी संबंधित आहेत. त्यासंदर्भात खोपकर यांना प्रश्न विचारला असता, 'सर्वात आधी ते एक ज्येष्ठ मराठी कलाकार आहेत. त्यामुळे त्यांच्यावर अन्याय झाल्याने आपण मदतीसाठी धाऊन गेलो', अशी प्रतिक्रिया खोपकर यांनी दिली. भविष्यात शिवसेनाप्रमुख बाळासाहेब ठाकरे यांच्यावरही चित्रपट निघत असून त्याबाबतही अन्याय झाल्यास आम्ही आंदोलन करू, असा इशारा खोपकर यांनी दिला.