म. टा. प्रतिनिधी, मुंबई
कारमधून प्लास्टिकचे आवरण रस्त्यात टाकल्याने अभिनेत्री अनुष्का शर्माने शाब्दिक डोस दिल्याचा व्हिडीओ क्रिकेटपटू विराट कोहलीने सोशल मीडियावर टाकला होता. या व्हिडीओतील अरहान सिंग या तरुणाने याप्रकरणी दोघांना कायदेशीर नोटीस पाठवली आहे.
मुंबईतील एका रस्त्यावर घडलेल्या या घटनेविषयीचा व्हिडीओ विराटने १६ जूनला ट्विटरवर अपलोड केला होता. तो काही मिनिटांतच 'व्हायरल' झाला. काहींनी रस्त्यावर अस्वच्छता करणाऱ्या अरहानला खडे बोल सुनावल्याबद्दल अनुष्काचे कौतुक केले होते, तर काहींनी हा निव्वळ प्रसिद्धी मिळवण्याचा प्रकार आहे, असे म्हणत त्या व्यक्तीला चांगल्या पद्धतीनेही सांगता आले असते, अशी प्रतिक्रिया व्यक्त केली होती. या पार्श्वभूमीवर 'या दोघांनी सोशल मीडियाच्या माध्यमातून आपली अवहेलना केली', असे म्हणत अरहानने त्यांना कायदेशीर नोटीस बजावली आहे. 'माझ्या कायदेशीर सल्लागारांनी विराट व अनुष्काला नोटीस पाठवली आहे. आता बॉल त्यांच्या कोर्टात आहे. त्यांच्या उत्तराची मी प्रतीक्षा करत आहे', अशी प्रतिक्रिया अरहानने यासंदर्भात एका वृत्तसंस्थेला दिली.