म. टा. वृत्तसेवा, नवी मुंबई
महापालिकेमार्फत राबविण्यात येत असलेले स्वच्छताविषयक उपक्रम जास्तीत जास्त लोकाभिमुख होण्यासाठी, तसेच नागरिकांच्या स्वच्छताविषयक वर्तणुकीमध्ये बदल घडविण्यासाठी माहिती, शिक्षण, प्रसार व जनजागृती अंतर्गत विविध उपक्रम राबविण्यात येत आहेत. त्या अनुषंगाने महापालिका क्षेत्रातील रहिवाशांना कचरा वर्गीकरण व प्रक्रिया तसेच इतर स्वच्छताविषयक उपक्रम राबविण्यास प्रोत्साहन देणे या दृष्टीने स्वच्छता स्पर्धेचे आयोजन करण्यात आले आहे.
एप्रिल ते जून व जुलै ते सप्टेंबर या कालावधीत शहरातील हॉटेल, शाळा, गृहनिर्माण संस्था/ आरडब्ल्यूए, मार्केट असोसिएशन, सरकारी कार्यालये व रुग्णालये या प्रमुख सहा गटांमध्ये स्वच्छता स्पर्धेचे आयोजन करण्यात आले. या स्पर्धेच्या धर्तीवर ऑक्टोबर ते डिसेंबर या कालावधीत या स्वच्छता स्पर्धांचे आयोजन करायचे आहे. या स्पर्धेत सहा गटांव्यतिरिक्त शहरी क्षेत्रातील प्रभाग, गावठाण भागातील प्रभाग व झोपटपट्टी क्षेत्रातील प्रभाग अशा गटांचादेखील नव्याने समावेश करण्यात येत आहे. त्यामुळे डिसेंबरमध्ये सात गटांमध्ये महापालिकेच्या वतीने स्वच्छता स्पर्धा घेण्यात येणार आहे. या स्पर्धेचे गुणांकन करण्यासाठी निकष निश्चित करण्यात आले असून त्यामध्ये प्रामुख्याने कचरा वर्गीकरण, कचऱ्यावर कचरा निर्मितीच्या ठिकाणीच प्रक्रिया करणे, शौचालय व्यवस्था, स्वच्छताविषयक पायाभूत सुविधा इत्याही बाबींवर भर देण्यात आला आहे.
या स्वच्छता स्पर्धेमध्ये सहभागी होऊ इच्छिणाऱ्या संस्थांनी ५ ते १६ डिसेंबर या कालावधीत संबंधित विभाग कार्यालयात अर्ज दाखल करायचे आहेत. स्पर्धेचे प्रत्यक्ष स्थळ परीक्षण व गुणांकन १६ डिसेंबर ते २१ डिसेंबर या कालावधीत करण्यात येणार आहे. या स्वच्छता स्पर्धेमध्ये नागरिकांचा उत्स्फूर्त सहभाग अपेक्षित असून नागरिकांना प्रोत्साहन मिळावे, यासाठी जून, सप्टेंबर व डिसेंबर या तिन्ही स्पर्धांमधील महापालिका स्तरावरील अंतिम विजेत्यांच्या सरासरीनुसार रोख बक्षिसांसाठी विजेत्यांची निवड करण्यात येणार आहे.