बेलापूर किल्ल्याच्या दुरुस्तीस मंजुरी

नवी मुंबई : ऐतिहासिक बेलापूर येथील किल्ल्याची दुरुस्ती व संवर्धनाची कामे करण्यास पुरातत्व विभागाने सिडकोला मंजुरी दिली आहे.

पोतुगीजांनी बांधलेल्या आणि नंतर पेशव्यांनी जिंकलेल्या नवी मुंबईतील एकमेव ऐतिहासिक वास्तू असलेल्या बेलापूर किल्ल्याचे जतन व्हावे, यासाठी आमदार मंदा म्हात्रे यांनी सिडको व राज्य सरकारकडे पाठपुरावा केल्याने अखेर सिडकोने बेलापूर किल्ल्याच्या दुरुस्ती व संवर्धनासाठी १६ कोटी ६५ लाख रुपये खर्च करण्याची तयारी दाखवली असून नोव्हेंबर महिन्याअखेरपर्यंत या कामाची निविदा प्रसिद्ध करण्यात येणार आहे. तसेच दोन वर्षांत हे काम पूर्ण करण्याचा प्रशासनाचा प्रयत्न असणार आहे. किल्ल्याला पर्यटनाचे स्वरूप यावे, यासाठी सर्व आधुनिक सोयी सुविधादेखील या ठिकाणी उपलब्ध करून दिल्या जाणार असल्याचे सिडकोचे व्यवस्थापकीय संचालक भूषण गगराणी यांनी सांगितले.