म. टा. वृत्तसेवा, नवी मुंबई
कळंबोलीतील ग्यान आश्रमशाळेतील तीन अल्पवयीन भावांवरील लैंगिक अत्याचारप्रकरणी संस्थेचे संस्थापक पीटर पॉल यांच्याविरुद्ध पॉस्को अंतर्गत गुन्हा दाखल करण्यात आला असून त्यांना या प्रकरणात अटक केली जाईल, असे आश्वासन मुख्यमंत्री देवेंद्र फडणवीस यांनी गुरुवारी विधानसभेत दिले. ग्यान आश्रमशाळेतील मुलांवर झालेल्या अत्याचाराबाबत विरोधी पक्षनेते राधाकृष्ण विखे-पाटील यांनी लक्षवेधी सूचना उपस्थित केली होती. त्याला उत्तर देताना मुख्यमंत्री देवेंद्र फडणवीस यांनी हे आश्वासन दिले.
अनाथ व निराश्रीत मुलांसाठी कळंबोली येथे असलेल्या ग्यान आश्रममधील तिघा सावत्र भावांवर त्याच आश्रमातील तिघा केअरटेकर तरुणांनी लैंगिक अत्याचार केल्याची धक्कादायक घटना फेब्रुवारी महिन्यामध्ये घडली होती. या मुलांवर झालेल्या अत्याचाराबाबत विरोधी पक्षनेते राधाकृष्ण विखे-पाटील यांनी लक्षवेधी सूचना उपस्थित केली होती. यावर उत्तर देताना मुख्यमंत्र्यांनी ग्यान आश्रमाच्या संस्थापकालादेखील यात सहआरोपी केल्याची माहिती सभागृहाला दिली. या घटनेसंदर्भात महिला व बालविकास मंत्री पंकजा मुंडे यांनीदेखील कळंबोलीतील ग्यान आश्रमशाळा ही बालन्याय (मुलांची काळजी व संरक्षण) अधिनियमांतर्गत सरकारकडे नोंदणीकृत नसून ती अनधिकृत असल्याचे सांगितले, तसेच या प्रकरणात संस्थेचे अधीक्षक गौरव कामत, स्वयंपाकी, सफाईगार आणि पहारेकरी या चार आरोपींसह संस्थापक पीटर पॉल यांच्याविरुद्ध पॉस्कोअंतर्गत गुन्हा दाखल करण्यात आल्याचे तसेच या संस्थेतील मुले पालकांजवळ परत पाठविण्यात आले असून काही बालकांना कर्जत येथील बाल सुधारगृहात स्थलांतरित केल्याचे सांगितले.
बेकायदा संस्थांवर कडक कारवाई
आश्रमशाळांतील लहान मुलांवरील लैंगिक अत्याचार ही अत्यंत गंभीर बाब असून या पुढील काळात प्रत्येक जिल्ह्यात ग्यान आश्रमसारख्या बेकायदा संस्था असल्यास त्यांच्यावर कडक कारवाई केली जाईल, असेही पंकजा मुंडे यांनी यावेळी स्पष्ट केले.