म. टा. वृत्तसेवा, नवी मुंबई
कोपरखैरणे भागात एम्फेटामाइन हा अंमली पदार्थ विकणाऱ्या त्रिकुटाला गुन्हे शाखेच्या अंमली पदार्थविरोधी पथकाने सापळा लावून अटक केली. पोलिसांनी या त्रिकुटाच्या ताब्यातून तब्बल सहा लाख ५४ हजार रुपये किंमतीचा १२५ ग्रॅम वजनाचा एम्फेटामाइन हा अंमली पदार्थ जप्त केला.
कोपरखैरणे परिसरामध्ये दोन व्यक्ती अंमली पदार्थांची विक्री करण्यासाठी येणार असल्याची माहिती अंमली पदार्थविरोधी पथकाला मिळाली होती. त्यानुसार वरिष्ठ पोलिस निरीक्षक रवींद्र बुधवंत व त्यांच्या पथकाने गुन्हे शाखेचे पोलिस उपायुक्त प्रवीणकुमार पाटील यांच्या मार्गदर्शनाखाली शुक्रवारी कोपरखैरणे सेक्टर-२० भागात सापळा लावला होता. यावेळी त्या ठिकाणी संशयास्पद फिरणाऱ्या गोकुळ गुरुनाथ गायकवाड (२०) आणि अमित राजकुमार शिरसाठ (२९) या दोघांना ताब्यात घेऊन त्यांची झडती घेतली असता, त्यांच्याजवळ सुमारे तीन लाख रुपये किंमतीचे ६० ग्रॅम वजनाचे एम्फेटामाइन हे अंमली पदार्थ आढळून आले. त्यामुळे पोलिसांनी दोघांची कसून चौकशी केली असता, त्यांनी अंमली पदार्थ अंबरनाथ येथे राहणाऱ्या सागर जोशी याने दिल्याची माहिती दिली.
त्यानुसार अंमली पदार्थविरोधी पथकाने अंबरनाथमधील एकविरा हॉटेलजवळ सापळा लावून सागर जोशी याला ताब्यात घेतले. त्यानंतर पोलिसांनी त्याची अंगझडती घेतली असता त्याच्याजवळ तीन लाख २५ हजार रुपये किमतीचे ६५ ग्रॅम वजनाचे एम्फेटामाइन आढळून आले. त्यामुळे पोलिसांनी हे अंमली पदार्थ जप्त करून सागर जोशी याला अटक केली. सागर कदम हा अंबरनाथ येथील फार्मा केमिकल्स कंपनीत हेल्पर म्हणून कामाला असून त्याने हे एम्फेटामाइन कुठून आणले, याबाबत अधिक तपास सुरू असल्याचे वरिष्ठ पोलिस निरीक्षक बुधवंत यांनी सांगितले. न्यायालयाने सागर जोशी याची १४ ऑक्टोबरपर्यंत पोलिस कोठडी ठोठावल्याचेही त्यांनी सांगितले.