नवी मुंबई : १८ वर्षांखालील अल्पवयीन मुलांना, सिगारेट व अन्य तबांखुजन्य पदार्थाची विक्री करणाऱ्या वाशीतील एका पानटपरी चालकाला गुन्हे शाखेच्या अंमली पदार्थ विरोधी पथकाने अटक केली आहे.
१८ वर्षांखालील अल्पवयीन मुलांना, सिगारेट व अन्य तंबाखुजन्य पदार्थाची विक्री करण्यास बंदी असतानाही वाशी सेक्टर २मधील पान टपरीचालक हा अल्पवयीन मुलांना सिगारेट व अन्य तंबाखुजन्य पदार्थाची विक्री करत असल्याची माहिती गुन्हे शाखेच्या अंमली पदार्थ विरोधी पथकाला मिळाली होती. त्यानुसार अंमली पदार्थ विरोधी पथकाने गुरुवारी वाशी सेक्टर २मधील पान टपरीवर पाळत ठेवली होती. यावेळी पान टपरीवर एक १६ वर्षीय मुलगा हा सिगारेटची खरेदी करण्यासाठी गेला असताना अंमली पदार्थ विरोधी पथकाने त्याचे व्हीडीओवर चित्रीकरण केले. त्यानंतर पथकाने त्याच्या पानटपरीवर छापा मारून टपरीचालक कन्हैयालाल गुप्ता (५५) याला अटक केली. या टपरी चालकावर जुनाइल जस्टिस अॅक्ट व कोटपा अॅक्टनुसार गुन्हा दाखल करण्यात आल्याची माहिती अंमली पदार्थ विरोधी पथकाचे वरिष्ठ पोलिस निरीक्षक रविंद्र बुधवंत यांनी दिली.
१८ वर्षांखालील अल्पवयीन मुलांना पान, सुंगधीत सुपारी, तंबाखु, गुटखा, सिगारेट, दारू या प्रकारचे तंबाखुजन्य पदार्थ तसेच अंमली पदार्थाची विक्री केल्यास दुकानदाराविरुद्ध बाल अधिनियम (ज्युवेनाइल जस्टिस अॅक्ट) २०१५चे कलम ७७, ७८प्रमाणे कारवाई करण्यात येते. या कायद्यानुसार आरोपीस सात वर्षे सक्षम कारावास व एक लाख रुपये दंड किंवा दोन्ही शिक्षा होऊ शकतात.