बदलत्या काळाप्रमाणे आयुर्वेद क्षेत्रात संशोधन व्हावे

म. टा. प्रतिनिधी, लातूर

बदलत्या काळाप्रमाणे आयुर्वेदाच्या क्षेत्रातही नवनवे संशोधन आवश्यक आहे. त्यासाठी महाराष्ट्र वैद्यकीय विद्यापीठाने जवळपास एक कोटी रुपयांची तरतूद केली आहे. यासाठी विद्यार्थ्यांबरोबर शिक्षक, प्राध्यापकांना संधी असून, शिक्षक, प्राध्यापक आणि विद्यार्थ्यांनी यात सहभागी होऊन नवनवीन संशोधन करावे, असे आवाहन नांदेड येथील शासकीय आयुर्वेद महाविद्यालयाचे अधिष्ठाता डॉ. यशवंत पाटील यांनी केले.

लोकनेते विलासराव देशमुख यांच्या प्रेरणा दिनानिमित्त येथील कै. बी. व्ही़ काळे आयुर्वेद महाविद्यालय येथे शनिवारी आयोजित आयुर्वेद डॉक्टरांसाठी दोन दिवसीय राष्ट्रीय शोध निबंध स्पर्धेचे आयोजन करण्यात आले आहे. यावेळी महाराष्ट्र आरोग्य विज्ञान विद्यापीठाचे सिनेट सदस्य डॉ़ डी. एन. चिंते, ज्येष्ठ पत्रकार मंगेश देशपांडे-डोंग्रजकर, प्रशासकीय अधिकारी डॉ. पी. पी. शहा, सुशीलादेवी महाविद्यालयाचे प्राचार्य अजय पाटील, विभाग प्रमुख डॉ. मारुती नरहरे, अन्वेषण २०१९ कार्यक्रमाच्या सचिव डॉ. पल्लवी जाधव, वरिष्ठ सदस्य सय्यद नजीर, विद्यापीठ प्रतिनिधी संगीता देशमुख आदींची उपस्थिती होती.

यावेळी डॉ. चिंते यांनी संशोधन ही आजच्या काळाची गरज आहे. विद्यार्थी शिक्षण, प्रशिक्षण, शिक्षक आणि संशोधन ही निरंतर चालणारी प्रक्रिया आहे. सतत ही प्रक्रिया सुरू राहिली, तरच ते आजच्या काळाला उपयुक्त ठरते, असे मत त्यांनी व्यक्त केले. डॉ. पी. पी. शहा यांनी महाविद्यालयाच्या वतीने घेण्यात येणाऱ्या उपक्रमाची माहिती देऊन यावर्षी शोध निबंध स्पर्धेत १४६ विद्यार्थ्यांनी भाग घेतल्याचे सांगितले. या स्पर्धेसाठी सोलापूर, नांदेड, उस्मानाबाद, नांदेड व विविध राज्यातील डॉक्टर विद्यार्थी आले आहेत. सूत्रसंचालन डॉ. पल्लवी खंदारे यांनी केले तर आभार डॉ. पल्लवी जाधव यांनी मानले.