म. टा. वृत्तसेवा, पनवेल
अखिल भारतीय मराठी नाट्य परिषद, पनवेल शाखा व चांगू काना ठाकूर कॉलेजच्या संयुक्त विद्यमाने आयोजित केलेल्या राज्यस्तरीय अटल करंडक एकांकिका स्पर्धेत औरंगाबादच्या मादी एकांकिकेने प्रथम क्रमांक पटकावला. ९८व्या नाट्यसंमेलनाच्या अध्यक्षा कीर्ती शिलेदार यांच्या प्रमुख उपस्थितीत पनवेलमध्ये नाट्यस्पर्धेचा पारितोषिक वितरण समारंभ पार पडला.
७ ते ९ डिसेंबरदरम्यान आयोजित करण्यात आलेली राज्य नाट्य स्पर्धा महाराष्ट्रातील विविध केंद्रांवर घेण्यात आली होती. पनवेलच्या रामशेठ ठाकूर सामाजिक विकास मंडळ पुरस्कृत नाट्यस्पर्धेत महाराष्ट्रातील अनेक संस्थांच्या एकांकिका सहभागी झाल्या होत्या. स्पर्धेची अंतिम फेरी पनवेलच्या फडके नाट्यगृहात घेण्यात आली. ठाण्याच्या फोर्थ वॉल संस्थेच्या 'चौकट' एकांकिकेने द्वितीय तर एमडी कॉलेजच्या 'तुरटी' एकांकिकेने तृतीय क्रमांक पटकावला. या स्पर्धेत पुण्याच्या नौटंकी संस्थेच्या 'बिबट्या' एकांकिकेस चतुर्थ क्रमांक देण्यात आला. उत्तेजनार्थ पारितोषिक पनवेलच्या सीकेटी कॉलेजच्या 'लपंडाव'ला देण्यात आले. लक्षवेधी एकांकिकेचे पारितोषिक पनवेलच्याच नाट्यदीप थिएटरच्या 'साकव'ने प्राप्त केले. स्पर्धेत सर्वोत्कृष्ट अभिनेता ओमकार राऊत (बेनिफिट ऑफ डाऊट), सर्वोत्कृष्ट अभिनेत्री सायली बांदकर (रेनबोवाला), सर्वोत्कृष्ट लेखक ओंकार राऊत (बेनिफिट ऑफ डाऊट), सर्वोत्कृष्ट दिग्दर्शक अभिजीत मोहिते (बेनिफिट ऑफ डाऊट) या कलाकारांनी पटकाविले. या स्पर्धेचे परीक्षण विजय कदम, संतोष पवार आणि भारत सावळे यांनी केले.
या वेळी कदम यांनी व्यक्त केलेल्या मनोगतात स्पर्धकांनी वेळ व शिस्त पाळणे महत्त्वाचे असून, इतरांच्या एकांकिका अभ्यासूवृत्तीने पाहणेही तितकेच गरजेचे असल्याचे म्हटले. त्यामुळे आपण कोठे चुकतो, हे समजणे सोपे होईल, असा सल्ला कलाकारांना दिला. मराठी रसिकांना नाटकांची भूक आहे, कलाकारांनी रसिकांना नवनवीन चांगल्या दर्जाची नाटके देण्याचे आवाहन कीर्ती शिलेदार यांनी यावेळी केले. या कार्यक्रमाला प्रमुख पाहुणे म्हणून सुप्रसिद्ध सिनेदिग्दर्शक पद्मश्री रमेश सिप्पी, अभिनेत्री किरण जुनेजा सिप्पी, हेमांगी खोपकर, निर्माती, दिग्दर्शक कल्पना कोठारी, सिडकोचे अध्यक्ष आमदार प्रशांत ठाकूर आदींसह अनेक जण उपस्थित होते.