म. टा. वृत्तसेवा, नवी मुंबई
रेल्वे स्थानकावरील बाकड्यावर बसून अंमली पदार्थाचे सेवन करणाऱ्या तरुणांना हटकणाऱ्या प्रवाशांवर दोघा गर्दुल्ल्या तरुणांनी हल्ला केल्याची घटना शुक्रवारी सीवूड्स रेल्वे स्थानकावर घडली. या हल्ल्यात प्रवासी जखमी झाला असून वाशी रेल्वे पोलिसांनी एका अल्पवयीन तरुणाला ताब्यात घेतले आहे. पोलिसांनी आता या घटनेतील दुसऱ्या अल्पवयीन तरुणाचा शोध सुरू केला आहे.
या हल्ल्यात जखमी झालेल्या तरुणाचे नाव गणेश परसे असे असून ते उलवे सेक्टर ५मध्ये रहाण्यास आहेत. १३ सप्टेंबर रोजी रात्री पावणेनऊच्या सुमारास गणेश परसे हे उलवे येथे घरी जाण्यासाठी सीवूड्स रेल्वे स्थानकावर फलाट क्र.४वर खारकोपर लोकलची वाट बघत बसले होते. त्याच लोखंडी बाकड्यावर बसलेल्या दोघा गर्दुल्ल्या तरुणांनी अंमली पदार्थाचे सेवन करण्यास सुरुवात केली. अंमली पदार्थाचा वास सहन न झाल्याने गणेश यांनी दोघा गर्दुल्ल्या तरुणांना हटकून त्यांना दुसरीकडे जाऊन व्यसन करण्यास बजावले. याचा राग आल्याने त्यांनी गणेश यांना शिवीगाळ करून धमकावण्यास सुरुवात केली. त्यानंतर त्यातील एका तरुणाने त्याच्याजवळच्या शस्त्राने त्यांच्या हनुवटीवर हल्ला केला. तर, दुसऱ्याने त्यांच्या पाठीवर व मानेवर जड वस्तूने मारहाण करून पलायन केले. या हल्ल्यात गणेश जखमी झाल्याने त्यांनी रुग्णालयात उपचार घेऊन दुसऱ्या दिवशी वाशी रेल्वे पोलिस ठाण्यात तक्रार दाखल केली. त्यानुसार या प्रकरणातील दोघा अल्पवयीन तरुणांवर मारहाणीसह अन्य कलमांन्वये गुन्हा दाखल करून त्यातील एका अल्पवयीन तरुणाला ताब्यात घेण्यात आले आहे.
रेल्वे स्थानक व परिसरामध्ये वावरणाऱ्या व अंमली पदार्थाचे सेवन करणाऱ्या गर्दुल्ल्यांवर नियमित कारवाई करण्यात येते. गेल्या आठ महिन्यांमध्ये २१ गर्दुल्ल्यांना अटक करून त्यांच्यावर कारवाई करण्यात आली आहे.
नंदकिशोर गस्ते, वरिष्ठ पोलिस निरीक्षक