अश्विनी बिद्रे हत्याकांडप्रकरणी महासंचालकांची परवानगी
म. टा. वृत्तसेवा, नवी मुंबई
सहाय्यक पोलिस निरीक्षक अश्विनी बिद्रे हत्याकांड प्रकरणात पनवेल येथील न्यायालयात सुरू असलेल्या सुनावणीप्रसंगी विशेष सरकारी अभियोक्ता प्रदीप घरत यांना सहाय्य करण्यासाठी यापुढे आता प्रत्येक तारखेस या गुन्ह्यातील सुरुवातीच्या काळात तपास अधिकारी राहिलेल्या पोलिस उपअधीक्षक संगीता अल्फान्सो शिंदे यांना उपस्थित राहण्याची परवानगी राज्याच्या पोलिस महासंचालकांनी दिली आहे.
बिद्रे हत्याकांड प्रकरणाच्या गुन्ह्यात तपास अधिकारी राहिलेल्या संगीता शिंदे-अल्फान्सो यांना या गुन्ह्यातील बरीच माहिती असल्याने न्यायालयात सुनावणीच्यावेळी त्यांची मदत भासू शकते म्हणून सुनावणीच्या प्रत्येक तारखेस त्यांना न्यायालयात हजर राहण्यासाठी परवानगी देण्याची मागणी विशेष सरकारी अभियोक्ता प्रदीप घरत यांनी राज्याच्या पोलिस महासंचालकांकडे ५ डिसेंबर रोजी केली होती. त्यांच्या मागणीच्या अनुषंगाने पोलिस महासंचालकांनी परवानगी दिल्यानंतर कायदा व सुव्यवस्था विभागाचे विशेष पोलिस महानिरीक्षक मिलिंद भारांबे यांनी १२ डिसेंबर रोजी याबाबत विभागीय समाजकल्याण अधिकारी कोकण विभाग व पोलिस आयुक्त नवी मुंबई यांना बिद्रे प्रकरणात यापुढील होणाऱ्या प्रत्येक सुनावणीप्रसंगी घरत यांना मदत करण्यासाठी कोकण विभागीय समाजकल्याण विभागात प्रतिनियुक्तीवर कार्यरत असलेल्या पोलिस उपअधीक्षक संगीता अल्फान्सो शिंदे यांना उपस्थित राहण्यास सांगितले.
याबाबत नवी मुंबई गुन्हे शाखेचे सहाय्यक पोलिस आयुक्त अजय कदम यांनी १७ डिसेंबर रोजी विभागीय समाजकल्याण अधिकाऱ्यांना पोलिस महासंचालकांनी दिलेल्या आदेशाबाबत अवगत करून संगीता अल्फान्सो शिंदे यांना १९ डिसेंबर रोजी पार पडणाऱ्या सुनावणीप्रसंगी हजर राहण्यास सांगितले होते. त्यानुसार त्या गुरुवारी पनवेल न्यायालयात उपस्थित होत्या. या प्रकरणाची पुढील सुनावणी येत्या १० जानेवारी २०२० रोजी होणार असल्याचे न्यायमूर्ती राजेश असमर यांनी सांगितले.