शैक्षणिक उपक्रमासाठी दिलेल्या इमारतीचा गैरवापर
सिडकोकडून भूखंड ताब्यात घेण्याची कारवाई
मनोज जालनावाला, नवी मुंबई
घणसोली येथे शैक्षणिक उपक्रमासाठी सिडकोने दिलेल्या भूखंडाच्या करारनाम्यातील अटीशर्तीचा भंग केल्याप्रकरणी अखेर सिडकोने जनोद्धार शिक्षण प्रसारक मंडळासोबतचा करारनामा रद्द करून हा भूखंड पुन्हा स्वत:च्या ताब्यात घेण्याची धडक कारवाई सोमवारी केली. सिडकोच्या या धडक कारवाईमुळे नवी मुंबईतील अन्य शिक्षण संस्थाचालकांचे धाबे दणाणले आहेत.
सिडकोने शैक्षणिक उपक्रमासाठी जनोद्धार शिक्षण प्रसारक मंडळाला घणसोली येथे भूखंड क्रमांक २४४ हा तीन हजार ५१७ चौ. मी. क्षेत्रफळाचा भूखंड प्राथमिक व माध्यमिक शाळा सुरू करण्यासाठी ३ ऑगस्ट २००४ रोजी दिला होता. दरम्यानच्या काळात सिडकोच्या सामाजिक सेवा विभागाने केलेल्या पडताळणीत या ठिकाणी तळमजला अधिक सहा मजले परंतु प्लास्टर न करता अर्धवट बांधलेल्या या इमारतीत ट्री हाऊस नामक ही त्रयस्थ संस्था इमारतीच्या काही भागात शाळा चालवत असल्याचे आढळून आले. तसेच, अर्धवट बांधलेल्या या इमारतीला महापालिकेला भोगवटा प्रमाणपत्रदेखील प्राप्त झाले नसल्याने महापालिकेनेही या संस्थेला 'कारणे दाखवा' नोटीस बजावून इमारतीचा वापर बंद करण्यास वारंवार नोटीस बजावल्याचा अहवाल सिडकोच्या वसाहत विभागास प्राप्त झाला होता.
त्याअनुषंगाने सिडकोच्या वसाहत विभागाने ११ व १८ एप्रिल २०१८ रोजी या संस्थेने या भूखंडावर अर्धवट इमारत बांधून महापालिकेचे भोगवटा प्रमाणपत्र न घेता या इमारतीचा वापर सिडकोच्या परवानगीविना ट्री हाऊस नामक त्रयस्थ संस्थेकडून सुरू ठेवल्याबद्दल दिलेला भूखंड रद्द का करण्यात येऊ नये, अशी 'कारणे दाखवा' नोटीस बजावून ३ मे २०१८पर्यंत म्हणणे सादर करण्यास सांगितले होते. परंतु संबंधित संस्थेकडून सिडकोला आवश्यक ती कागदपत्रे सादर न झाल्याने अखेर सिडकोने जनोद्धार शिक्षण प्रसारक मंडळाला दिलेला भूखंडाचा करारनामा रद्द करण्याची कारवाई व्यवस्थापकीय संचालक सिडको यांच्या आदेशान्वये ४ मे २०१८ रोजी केली. त्याअनुषंगाने गुरुवारी घणसोली येथे जाऊन सिडकोचे सहाय्यक वसाहत अधिकारी, सुरक्षारक्षक, भूमापक व आजूबाजूच्या अन्य साक्षीदारांच्या (पंचांच्या) सह्या घेऊन हा भूखंड ताब्यात घेतल्याची माहिती सिडकोचे वसाहत अधिकारी(2) करण शिंदे यांनी दिली. सिडकोच्या वसाहत विभागाच्या अधिकाऱ्यांनी भूखंड पुन्हा सिडकोच्या ताब्यात मिळवण्यासाठी राबविलेल्या या धडक कारवाईमुळे नवी मुंबईतील अन्य संस्थाचालकांचे धाबे दणाणले आहेत.
शैक्षणिक, आरोग्य व सामाजिक उपक्रमासाठी सिडकोने राखीव किंमतीत दिलेल्या भूखंडांचा संबंधित संस्थांनी सिडकोसोबत केलेल्या करारनाम्यातील अटी व शर्तींचा भंग करून गैरवापर करण्याचे अनेक प्रकार उघडकीस आले आहेत. भूखंडाचा गैरवापर करणाऱ्या अशा संस्थांवर नियंत्रण ठेवण्यासाठी सिडको व्यवस्थापनाने कठोर पावले उचलण्यास सुरुवात केली असल्याचे सिडकोचे वसाहत विभाग १चे व्यवस्थापक फैय्याज खान व वसाहत अधिकारी करण शिंदे यांनी सांगितले.