म. टा. वृत्तसेवा, नवी मुंबई
सिडकोच्या परवडणाऱ्या नऊ हजार २४९ घरांची योजनेची सोडत २६ नोव्हेंबर रोजी काढण्यात आली होती. या गृहनिर्माण योजनेतील शिल्लक राहिलेली ९९१ घरे प्रतीक्षायादीतील खुल्या प्रवर्गातील अर्जदारांना वाटप करण्याचा महत्त्वाचा निर्णय सिडकोचे उपाध्यक्ष तथा व्यवस्थापकीय संचालक लोकेश चंद्र यांनी घेतला आहे. प्रधानमंत्री आवास योजनेतील सर्वांसाठी घर या उद्दिष्टांतर्गत या योजनेतील घरे ही आर्थिकदृष्ट्या दुर्बल व अल्प उत्पन्न गटातील लोकांसाठी उपलब्ध करून देण्यात आली आहेत. या योजनेंतर्गत आर्थिकदृष्ट्या दुर्बल घटकासाठी तीन हजार १७६ सदनिका व अल्प उत्पन्न घटकासाठी सहा हजार ७३ सदनिका नवी मुंबईतील खारघर, कळंबोली, तळोजा व द्रोणागिरी येथे उपलब्ध करून देण्यात आल्या होत्या. त्यांपैकी तळोजा येथील आर्थिकदृष्ट्या दुर्बल घटक व अल्प उत्पन्न गटातील वेगवेगळ्या प्रवर्गातील एकूण ९९१ सदनिका शिल्लक राहिल्या होत्या.
सिडको संचालक मंडळाच्या ठरावानुसार अनुसूचित जाती, अनुसूचित जमाती, विमुक्त जाती व भटक्या जमाती या प्रवर्गाचे आरक्षण वगळता इतर प्रवर्गातील घरे शिल्लक राहिल्यास ही घरे सर्वसाधारण प्रवर्गांतर्गत वाटप करण्यात यावीत, असा निर्णय घेण्यात आला आहे. त्यानुसार ही शिल्लक ९९१ घरे याच गृहनिर्माण योजनेतील प्रतीक्षा यादीवरील सर्वसाधारण प्रवर्गातील अर्जदारांमध्ये वाटप करण्यात येणार आहेत. या निर्णयाच्या अनुषंगाने सर्वसाधारण प्रवर्गातील प्रतीक्षायादीतील विजेत्या ठरलेल्या अर्जदारांची यादी https://lottery.cidcoindia.com या वेबसाइटवर उपलब्ध करून देण्यात आली आहे.