म. टा. प्रतिनिधी, मुंबई
आगामी निवडणुकांच्या तोंडावर राष्ट्रवादी काँग्रेसने ९१ जणांची नवीन प्रदेश कार्यकारिणी जाहीर केली असून, त्यात अजितदादा पवार, सुप्रिया सुळे आणि छगन भुजबळ समर्थकांची वर्णी लागली आहे. तथापि, लातूरचे संजय बनसोडे यांचा अपवाद वगळता प्रदेश कार्यकारिणीत दलित, मातंग आदी उपेक्षित समाजघटकांना पुरेसे प्रतिनिधीत्व न मिळाल्यामुळे सामाजिक अन्यायाची भावना त्या घटकांमध्ये आहे. शिवाय माजी प्रदेशाध्यक्ष भास्करराव जाधव यांच्या मुंबई व ठाण्यातील समर्थकांना डावलण्यात आले आहे.
कोकणातील अजित पवार यांचे खंदे समर्थक सुनिल तटकरे यांच्या जागेवर प्रदेशाध्यक्ष म्हणून माजी मंत्री जयंत पाटील यांना आणल्यानंतर राष्ट्रवादीच्या पक्षश्रेष्ठींनी पक्षातील सर्व गटांना सोबत घेण्याची जबाबदारी पाटील यांच्यावर टाकली आहे. त्यामुळे नवीन कार्यकारिणी निवडताना त्यांनी अजित पवार, सुप्रिया सुळे आणि तीन वर्षांच्या विजनवासानंतर सक्रिय झालेले छगन भुजबळ यांच्या समर्थकांना पुरेसे स्थान मिळेल याची तजवीज केली आहे.