म. टा. विशेष प्रतिनिधी, मुंबई भारतीय जनता पार्टीच्या (भाजप) प्रदेश कार्यसमितीची विशेष बैठक आज, रविवारी गोरेगाव येथील नेस्को संकुल येथे होणार असून या बैठकीला राष्ट्रीय कार्यकारी अध्यक्ष जे. पी. नड्डा यांच्यासह मुख्यमंत्री देवेंद्र फडणवीस, प्रदेशाध्यक्ष व महसूल मंत्री चंद्रकांत पाटील, केंद्रीय मंत्री नितीन गडकरी हे नेते उपस्थित राहणार आहेत. तत्पूर्वी रविवारी सकाळी जे. पी. नड्डा हे चैत्यभूमी, स्वातंत्र्यवीर सावरकर स्मारक आणि शिवसेना प्रमुख बाळासाहेब ठाकरे स्मृतिस्थळ येथे जाऊन अभिवादन करणार आहेत. त्यानंतर १० वाजता ते बूथ सदस्यता कार्यक्रमात सहभागी होतील. या बैठकीत नड्डा यांच्या बरोबरच नवे प्रदेशाध्यक्ष महसूलमंत्री चंद्रकांत पाटील यांचे अध्यक्षीय भाषण होईल. त्याशिवाय केंद्रीय मंत्री नितीन गडकरी यांचेही मार्गदर्शन असेल. भाजपचे राष्ट्रीय कार्यकारी अध्यक्ष जे. पी. नड्डा यांचे शनिवारी मुंबईत आगमन झाले. विमानतळावर मुख्यमंत्री फडणवीस यांच्यासह भाजपच्या नेत्यांनी त्यांचे स्वागत केले.
भाजप प्रदेश कार्यसमितीची बैठक
म टा...
महाराष्ट्र टाइम्स.कॉम 21 Jul 2019, 4:00 am