म. टा. प्रतिनिधी, मुंबई शिवसेना पक्षप्रमुख उद्धव ठाकरे यांनी रविवारी मातोश्री निवासस्थानी शिवसेनेचे पदाधिकारी, जिल्ह्यातील संपर्क व विभागप्रमुख यांचे म्हणणे जाणून घेतले. त्यानंतर पत्रकारांशी बोलताना डॉ. नीलम गोऱ्हे म्हणाल्या की, युती करण्याबाबत दोन्ही पक्ष सकारात्मक असून, पक्षप्रमुख उद्धव ठाकरे हे लवकरच भूमिका स्पष्ट करतील. लवकरच युतीची घोषणा होण्याची शक्यता आहे. तरीही प्रत्येक पक्ष हा आपापली शक्ती तपासून पाहत असतो. मात्र सर्वांनी सबुरी ठेवावी, असेही डॉ. गोऱ्हे म्हणाल्या. 'सर्व शिवसेना खासदारांची पक्षप्रमुख उद्धव ठाकरे यांनी बैठक घेतली. विधानसभा मतदारसंघातील आढावा घेताना, त्या-त्या मतदारसंघातील राजकीय परिस्थिती व समस्या जाणून घेण्यात आल्या. तसेच युतीच्या जागावाटपात काही मतदारसंघांची अदलाबदल झाली तर काय चित्र राहील याचा अंदाज या बैठकीत घेण्यात आला', असे शिवसेना खा. हेमंत गोडसे यांनी पत्रकारांना सांगितले. युतीबाबतची घोषणा शिवसेना पक्षप्रमुख उद्धव ठाकरे करतील. शिवसेनेला चाचपणी करण्याची गरज नाही, असे शिवसेना खा. राजन विचारे यांनी सांगितले. निवडणुकीच्या तयारीला लागण्याचे आदेश असून, शिवसैनिकांमध्ये मोठा उत्साह आहे, असेही विचारे म्हणाले.
'दोन्ही पक्ष सकारात्मक'
म टा...
महाराष्ट्र टाइम्स.कॉम 16 Sep 2019, 4:00 am