बिल्डरविरोधात तक्रार

म. टा. वृत्तसेवा, नवी मुंबई

नेरुळ सेक्टर २० भागात बेकायदा उभारण्यात आलेल्या इमारती सिडकोने अनधिकृत ठरवून पाडून टाकल्यानंतर या इमारतीतील घरे विकत घेणाऱ्या ग्राहकांनी बांधकाम व्यावसायिकाविरोधात पोलिस ठाण्यात तक्रारी दाखल केल्या आहेत. या इमारती अनधिकृत असतानाही त्या अधिकृत असल्याचे सांगून त्यातील घरे १५ ते २० लाख रुपयांना विकून फसवणूक केल्याचे म्हणणे आहे. त्यानुसार नेरुळ पोलिसांनी बांधकाम व्यावसायिक आणि जमीन मालक अशा चौघांविरोधात फसवणुकीचा गुन्हा दाखल केला आहे.

नेरुळ सेक्टर २०मध्ये बांधकाम व्यावसायिक आणि जमीनमालकांनी इमारत अधिकृत असल्याचे सांगून फ्लॅटचे बुकिंग सुरू केले. मात्र ऑक्टोबरमध्ये सिडकोने ही इमारत अनधिकृत ठरवून ती पाडून टाकली. त्यामुळे ग्राहकांनी बांधकाम व्यावसायिक आण‌ि जमीनमालकांकडे रक्कम परत मिळवण्यासाठी तगादा लावला. सहा महिने होऊनही त्यांनी रक्कम परत न दिल्याने ग्राहकांनी नेरुळ पोलिस ठाण्यात तक्रार दाखल केली.