झोपडपट्टीधारकाविरोधात अदखलपात्र गुन्हा

म. टा. वृत्तसेवा, पनवेल

रस्ता काँक्रीटीकरणाच्या कामात अडथळा ठरणाऱ्या झोपड्यांचे पुनर्वसन करण्यासाठी गेलेल्या आयुक्त आणि महापालिकेच्या अधिकाऱ्यांसोबत हुज्जत घातल्याप्रकरणी भरत जाधव या झोपडपट्टीत राहणाऱ्या व्यक्तीवर अदखलपात्र गुन्हा दाखल केला आहे. पोलिसांनी जाधव यांना मंगळवारी सायंकाळी समज देऊन त्यांना सोडून दिले.

आंबेडकर पुतळ्याजवळ रस्ता काँक्रीटीकरणात तीन ते चार झोपड्यांचा अडसर आहे. रेल्वे स्थानकाकडे जाणाऱ्या रस्त्यावर गर्दी असल्यामुळे या झोपड्यांमुळे रस्ता निमुळता झाला आहे. हा रस्ता तयार करण्यासाठी झोपडपट्टीधारकांचे तात्पुरते पुनर्वसन करण्यासाठी आयुक्त डॉ. सुधाकर शिंदे, सहाय्यक उपायुक्त डॉ. भगवान खाडे, ज्युनिअर इंजिनीअर संजय कटेकर, भगवान पाटील आदी सायंकाळी आठच्या दरम्यान झोपडपट्टीची पहाणी करण्यासाठी गेले होते. झोपडपट्टीधारकांचे पुनर्वसन करण्यासाठी दुसऱ्या झोपडपट्टीतील भरत जाधव यांना बोलविण्यात आले. या झोपडपट्ट्यांना तुमच्या झोपडीजवळ तात्पुरती जागा द्या, अशी विनंती जाधव यांना आयुक्त डॉ. सुधाकर शिंदे यांनी केली. जाधव यांनी ‘मी जागा का देऊ?’, असा प्रतिप्रश्न आयुक्तांना केला. यावरून जाधव आणि अधिकाऱ्यांमध्ये शाब्दिक चकमक झाली. भगवान पाटील यांनी पनवेल शहर पोलिस ठाण्यात जाऊन जाधव यांच्या विरोधात तक्रार केली.