एटीएमचे कॅशबॉक्स उघडे

म. टा. वृत्तसेवा, उरण

रायगड जिल्ह्यातील उरण येथे एटीएम मशिनचा कॅशबॉक्स उघडाच राहिल्याचा प्रकार समोर आला. यामध्ये २० लाख रुपयांची रोकड होती. परंतु स्थानिक रहिवाशाने सतर्कता दाखवत याबाबत स्थानिक पोलिसांना माहिती दिली. यामुळे चोरी टळली.

सोमवारी रात्री ९ वाजण्याच्या सुमारास उरण शहरातील बाजारपेठेतील मुख्य रस्त्यालगत असलेल्या सेंट्रल बँक ऑफ इंडियाच्या एटीएममध्ये स्थानिक रहिवासी गेला असता एटीएम मशिनचे कॅशबॉक्स उघडे असल्याचे त्याच्या निदर्शनास आले. याबाबत त्याने पोलिसांना माहिती दिली. पोलिसांना तातडीने घटनास्थळी धाव घेऊन पाहणी केली आणि मशिनमध्ये रोकड टाकणाऱ्या एजन्सीला संपर्क केला. त्यानंतर, या एजन्सीच्या कर्मचाऱ्यांनी घटनस्थळी येऊन पाहणी केली असता एटीएम मशिनच्या कॅशबॉक्सचे दोन दरवाजे उघडेच असल्याचे निदर्शनास आले. यामध्ये २० लाख रुपयांची रोकड होती. स्थानिक रहिवाशाच्या सतर्कतेमुळे चोरीचा प्रसंग टळला.