म. टा. खास प्रतिनिधी, मुंबई
अंधेरी येथील एका तरुणीला विवाह जुळविणाऱ्या संकेतस्थळावरून एका भामट्याने एक लाख ३० हजारांचा गंडा घातल्याचा प्रकार उघडकीस आला आहे. तरुणीला परदेशातून भेटवस्तू पाठविल्याचे सांगत त्याने हे पैसे उकळले. याप्रकरणी साकीनाका पोलिस ठाण्यात गुन्हा दाखल करण्यात आला आहे.
पवई येथे एका नामांकित कंपनीत व्यवस्थापक पदावर काम करणाऱ्या तरुणीने विवाह जुळविणाऱ्या संकेतस्थळावर नोंदणी केली होती. तिचे प्रोफाइल पाहून राजीव दिवाण या तरुणाचा संदेश आला. तरुणीने संदेशाबाबत विचारल्यानंतर विवाह करण्यास इच्छुक असल्याचे राजीवने सांगितले. सध्या परदेशात असून मुंबईत आल्यावर याबाबत सविस्तर बोलणार असल्याचे त्याने सांगितले. यादरम्यान दोघांचे व्हॉट्सअपवर चॅटिंग सुरू झाले. त्यांची चांगली मैत्री झाल्यावर २१ नोव्हेंबरला तरुणीचा वाढदिवस असल्याचे राजीवला समजले. वाढदिवसासाठी खास गिफ्ट आणले असून ते कुरियरमार्फत मुंबईत पाठवीत असल्याचे राजीवने तरुणीला सांगितले. काही दिवसांनी तरुणीला आणखी एक फोन आला. नवी दिल्ली येथील इंदिरा गांधी आंतरराष्ट्रीय विमानतळावरून कस्टम अधिकारी बोलत असल्याचे तिला सांगण्यात आले. तुमच्या नावाचे पार्सल आले असून त्यामध्ये पॉड्स तसेच इतर महागड्या वस्तू आहेत. त्यामुळे या पार्सलच्या क्लियरन्स तसेच विविध कर भरावे लागतील, असे सांगून तिला १ लाख ३० हजार रुपये वेगवेगळ्या खात्यांमध्ये भरण्यास सांगण्यात आले. इतकी रक्कम भरूनही आणखी पैशाची मागणी केली जात असल्याने तरुणीने पैसे देण्यास नकार दिला. तिला संशय आल्याचे पाहून राजीवने मोबाइल बंद केला. फसवणूक झाल्याचे लक्षात येताच तिने साकीनाका पोलिस ठाण्यात तक्रार दाखल केली.