म. टा. वृत्तसेवा, नवी मुंबई
नवी मुंबई महापालिकेच्या कोपरखैरणे येथील सीबीएसई शाळेत पूर्व प्राथमिक तसेच पाचवी ते आठवीपर्यंत वर्ग सुरू केले जाणार आहेत. तसेच, या वर्गांसाठी ठोक मानधनावर शिक्षकांची पदेदेखील भरण्यात येणार आहेत. याबाबतचा प्रस्ताव महापालिकेने नुकत्याच झालेल्या सर्वसाधारण सभेत मंजुरीसाठी मांडला असता या प्रस्तावाला मंजुरी देण्यात आली आहे.
नवी मुंबई शहरातील गरीब कुटुंबातील विद्यार्थ्यांना दर्जेदार शिक्षण मिळावे, यासाठी नवी मुंबई महापालिकेने शाळांच्या प्रशस्त इमारती बांधल्या असून, विद्यार्थ्यांना विविध सुविधादेखील देण्यात येत आहेत. शैक्षणिक वर्ष २०१८-१९पासून सीवूड्स आणि कोपरखैरणे येथे सीबीएसई बोर्डाची शाळाही सुरू केली आहे. कोपरखैरणे येथील सीबीएसई शाळेमध्ये पूर्व प्राथमिक आणि इयत्ता पाचवी ते आठवीचे वर्गदेखील सुरू करावेत, तसेच शिक्षकांची भरती करण्याची मागणी स्थानिक नगरसेवक मुनावर पटेल यांनी महापालिकेडे केली होती. त्यानुसार महापालिकेच्या माध्यमातून हे वर्ग सुरू करण्याचा आणि ठोक मानधनावर शिक्षक भरती करण्याचा प्रस्ताव सर्वसाधारण सभेत मांडण्यात आला होता. त्या प्रस्तावास सभागृहाने मंजुरी दिली आहे.