स्वच्छतेसाठी महापालिका हद्दीत श्रमदान

म. टा. वृत्तसेवा, पनवेल

‘स्वच्छता हीच सेवा’ या अभियाना अंतर्गत पनवेल महानगरपालिका हद्दीत रविवारी सर्वसामान्य, लोकप्रतिनिधी आणि प्रशासनाने एकत्रित येऊन श्रमदान केले. रविवारी सुटीच्या दिवशी पनवेल महापालिकेच्या प्रत्येक प्रभागात हातात झाडू घेऊन स्वच्छता करण्यात आली. स्वच्छता अभियानात अनेक ठिकाणांहून मोठ्या प्रमाणात कचरा, प्लास्टिक जमा करण्यात आला.

पनवेल महानगरपालिका क्षेत्रात गेल्या वर्षभरात महापालिका आयुक्त डॉ. सुधाकर शिंदे यांनी स्वच्छतेवर भर दिला आहे. तसेच, महापालिका परिसरात हागणदारीमुक्त पनवेल अभियान यशस्वीपणे राबविण्यात आले आहे. यानंतर महापालिकेने घनकचरा व्यवस्थापनाकडे आपले लक्ष केंद्र‌ति केले आहे. त्यासाठी आयुक्त सुधाकर शिंदे यांच्या मार्गदर्शनाखाली स्वच्छता हीच सेवा हे अभियान रविवारी राबवण्यात आले. या माध्यमातून सर्वसामान्य तसेच, सामाजिक संस्थांना सहभागी करून घेऊन लोकचळवळ करण्याच्या उद्देशाने रविवारी स्वच्छता अभियान राबविण्यात आले. यामध्ये प्रत्येक प्रभागातील नगरसेवक, नागरिकांना सहभागी करून घेण्यात आले. तसेच, प्रशासनसुद्धा हातात झाडू घेऊन रस्त्यावर उतरले.

महापौर डॉ. कविता चौतमोल यांनी आपल्या प्रभागात सहकारी नगरसेवक संतोष शेट्टी, राजश्री वावेकर यांच्यासह स्वच्छता केली. प्रभाग क्रमांक १९मध्ये सभागृहनेते परेश ठाकूर यांच्या नेतृत्वाखाली स्वच्छता करण्यात आली. प्रभाग क्रमांक १५मध्ये नगरसेवक एकनाथ गायकवाड, संजय भोपी यांनी रहिवाशांसोबत साफसफाई केली. ‘स्वच्छता हीच सेवा’ या महापालिकेच्या उपक्रमात चांगू काना कॉलेजचे नॅशनल कॅडेट कोर्सचे विद्यार्थी सहभागी झाले होते.

कळंबोलीत राष्ट्रवादी काँग्रेसचे नगरसेवक सतीश पाटील यांनीही हातात झाडू घेत साफसफाई केली. त्यांचे सहकारी नगरसेवक बबन मुकादम आणि रहिवाशांनी सहभाग नोंदवला. खारघरमध्ये प्रभाग चारमध्ये नेत्रा पाटील यांच्यासह नगरसेवकांनी सेवा स्वच्छता अभियान यशस्वीपणे राबवले.

उद्यान, तलावांची आज सफाई

या अभियानांतर्गत सोमवारी महापालिका हद्दीतील तलाव, उद्यान आणि रुग्णालयांची सफसफाई करण्यात येणार आहे. त्या दृष्टीने नियोजन करण्यात आले आहे. यामध्येही लोकप्रतिनिधी, सामाजिक संस्था आणि सर्वसामान्य सहभागी होणार आहेत.