डॉ. श्रद्धा कांबळेवर शुभेच्छांचा वर्षाव
म. टा. वृत्तसेवा, पनवेल
आर्थिक परिस्थिती बेताची असताना अत्यंत कठीण परिस्थितीतून शिक्षण पूर्ण करून ध्येय प्राप्त करता येते, हे पनवेलच्या कांबळे कुटुंबातील श्रद्धाने दाखवून दिले आहे. पनवेलमध्ये सफाई कामगार असणारे मूळचे वडघर येथील शरद कांबळे यांच्या मुलगी श्रद्धा कांबळे एमबीबीएस झाली असून लवकरच ती रुग्णांच्या सेवेसाठी सज्ज होणार आहे.
पनवेल महापालिकेत मागील अनेक वर्षांपासून सफाई कामगार म्हणून काम करणारे शरद कांबळे मूळचे वडघरचे. मुलीने उच्चशिक्षित होऊन डॉक्टर व्हावे, अशी शरद कांबळे यांची पत्नी सुजल कांबळे यांची इच्छा होती. पनवेल शहरातील कोकण एज्युकेशनच्या व्ही. के. हायस्कूलमध्ये श्रद्धाचे शिक्षण झाले. बारावीपर्यंत शिक्षणासाठी फारसा खर्च आला नाही, मात्र मुलीने डॉक्टर व्हावे अशी सर्वांची इच्छा होती. मात्र भारतात एमबीबीएस शिक्षणासाठी येणारा खर्च त्यांना परवडणारा नव्हता. परिचयातील एक व्यक्तीने रशियात भारतापेक्षा कमी खर्चात वैद्यकीय शिक्षण पूर्ण होते, असे सांगितले. हा खर्चदेखील वडील शरद कांबळे यांना पेलवणारा नव्हता. अखेर शरद कांबळे यांचे लहान बंधू वसंत कांबळे यांनी पुतणीच्या शिक्षणाचा खर्च उचलून डॉक्टर होण्याचे तिचे स्वप्न पूर्ण करण्याचा ध्यास घेतला. सफाई कामगार असलेल्या शरद कांबळे यांना जेमतेम पगारातून थोडाफार खर्च केला, मात्र बराचसा खर्च माझ्या भावाने केल्याचे ते अभिमानाने सांगतात. सात वर्षे रशियात अभ्यासावर लक्ष केंद्रीत करून अभ्यास पूर्ण केल्यानंतर आता शरद कांबळे यांची मुलगी डॉ. श्रद्धा कांबळे झाली आहे. 'फॉरेन मेडिकल ग्रॅज्युट एग्झामिनेशन' ही परीक्षा तिने नुकतीच उत्तीर्ण केली. महापालिकेत, गावात ही गोष्ट समजताच शरद कांबळे आणि डॉ. श्रद्धावर अभिनंदन आणि शुभेच्छांचा वर्षांव होत आहे. पनवेलमध्ये एका कार्यक्रमासाठी आलेले केंद्रीय मंत्री रामदास आठवले यांच्या हस्ते नुकताच डॉ. श्रद्धाचा सत्कार करण्यात आला
माझे काका वसंत कांबळे यांचे आर्थिक सहकार्य आणि माझ्या आईवडिलांचे सहकार्य यामुळेच मी डॉक्टर होऊ शकले. आता माझा दवाखाना सुरू करून माझ्या सारख्याच गरीब कुटुंबातील रुग्णांची सेवा मला करायची आहे.
डॉ. श्रद्धा कांबळे