नवी मुंबई : बेलापूर विभाग कार्यालयातील प्रिंटर गेल्या माहिनाभरापासून बंद पडला आहे. त्यामुळे विभाग कार्यालयात विविध प्रकारच्या दाखल्यासाठी येणाऱ्या नागरिकांना नाहक त्रास सहन करावा लागत आहे. दाखल्यांसाठी नागरिकांना हेलपाटे मारावे लागत असून बाहेरच्या दुकानांत जाऊन प्रिंट काढावी लागत आहे. श्रीमंत महानगरपालिकेच्या यादीत असलेल्या नवी मुंबई पालिकेच्या विभाग कार्यालयातील हा प्रकार अत्यंत लाजीरवाणा आहे, अशी टीका नागरिक करत आहेत.
बेलापूर वॉर्ड कार्यालयात असणाऱ्या नागरी सुविधा केंद्रात नागरिकांना जन्मदाखला, मृत्यूदाखला आणि विवाह दाखला देण्यात येतो. मात्र,या केंद्रातील प्रिंटर खराब असल्याने नागरिकांना दिला जाणाऱ्या दाखल्याची प्रत बाहेरील खासगी दुकानातून काढण्यात येते. किंवा इतर विभागातील प्रिंटरमधून प्रिंट काढून कामे केली जात आहेत. यामुळे कर्मचारी हतबल झाले आहेत. येणाऱ्या नागरिकांना नेहमी काय उत्तर द्यायचे, असा प्रश्न त्यांना पडतो.
फक्त प्रशासनाच्या दिरंगाईमुळे ही सुविधा बंद आहे. या कार्यालयात झालेल्या प्रभाग समितीच्या बैठकीत हा विषय चांगलाच गाजला. जर, प्रशासनाला खर्च करणे परवडत नसेल तर अ प्रभाग समितीमधील नगरसेवकांकडून प्रत्येकी दोन हजार घ्या आणि बाहेरून विकतचा प्रिंटर उपलब्ध करून द्या, असे यावेळी नगरसेवक गणेश म्हात्रे यांनी सांगितले. सुविधांसाठी सहा लाखांपर्यंत खर्च करण्याचे अधिकार परिमंडळ स्तरावर दिले असतानाही, वॉर्ड ऑफिसमध्ये एक प्रिंटर दुरुस्त होऊ शकत नाही, हे चुकीचे आहे, असे मत त्यांनी व्यक्त केले. त्यानंतर लवकरच या केंद्रात प्रिंटर उपलब्ध करून देण्यात येईल, अशी ग्वाही वॉर्ड अधिकारी शशिकांत तांडेल यांनी दिली.